«ԼՂ հակամարտության գոտում լայնամասշտաբ ռազմական գործողությունները ցանկացած պահի կարող են վերսկսվել». Քերի Քավանո

717

Ուրբաթ, 19 հունվարի, 2018 թ., 15:50

Լեռնային Ղարաբաղի հակամարտության գոտում կա ցանկացած պահի ռազմական գործողությունների վերսկսման ռիսկ: Այս մասին հայտարարել է ԵԱՀԿ Մինսկի խմբի ամերիկացի նախկին համանախագահ, Քենթուքիի համալսարանի պրոֆեսոր Քերի Քավանոն, փոխանցում է Trend-ը:

Փորձագետը հիշեցրել է, որ 2017թ. ԵԱՀԿ-ում Ավստրիայի նախագահության ժամանակ մեծ ջանքեր են գործադրվել վստահության ամրապնդման մեխանիզմներն առաջ տանելու ուղղությամբ, որոնց շուրջ Երևանն ու Բաքուն համաձայնության են հասել 2016թ. Վիեննայի և Սանկտ Պետերբուրգի հանդիպումների ժամանակ:

«Չնայած այն հանգամանքին, որ միջադեպերի հետաքննության մեխանիզմը նախկինի պես բարդ է, ԵԱՀԿ դիտորդների թվի ավելացումը հնարավոր է: Եվ չնայած դա աննշան փոփոխություն կլինի, այնուամենայնիվ, այդ միջոցի իրականացումը կնշանակի իրավիճակի բարելավմանն ուղղված իրական քայլեր ձեռանարկելու՝ կողմերի պատրաստակամությունը»,- ասել է Քավանոն:

Նա նաև դրական է գնահատել այն փաստը, որ Ադրբեջանն ու Հայաստանը վերսկսել են նախագահների և ԱԳՆ ղեկավարների մակարդակով բանակցությունները: