«Հայաստանն սպառազինության համար Ռուսաստանից մեծ բոնուսներ է ստանում». Կոնովալով

Երեկ Ստոկհոլմի խաղաղության հիմնախնդիրների հետազոտման միջազգային ինստիտուտը (SIPRI) հրապարակել էր 2013-2017թթ. սպառազինությունների համաշխարհային առևտրի վիճակի մասին նոր զեկույցը, որի համաձայն՝ Հայաստանը վերջին 2 տարում 124 միլիոն դոլարի չափով սպառազինություն է ներմուծել, իսկ Ադրբեջանը՝ 551 միլիոն դոլարի չափով: Զեկույցում ասվում էր, որ մատակարարումների 100%-ը Հայաստան է ներկրվել Ռուսաստանից, իսկ Ադրբեջանը, բացի Ռուսաստանից, զենք է ստացել Իսրայելից, Չեխիայից, Սլովակիայից և այլ երկրներից:

Ռուս ռազմական փորձագետ Իվան Կոնովալովը կարծիք է հայտնել, որ դեպի Հայաստան սպառազինության մատակարարման ռուսական «մենիշխանությունը» և սպառազինություն մատակարարող երկրների քանակը մեծացնելու Ադրբեջանի փորձերն իրենց օբյեկտվի պատճառներն ունեն, սակայն արդյունքում ստացվում է, որ երկու երկրների կողմից ձեռք բերված պաշտպանողական և հարձակվողական սպառազինությունները միանման են և հավասար, ինչն, ըստ փորձագետի, տարածաշրջանում ապահովում է ուժի հավասարակշռությունը:

«Հայկական կողմից լուրջ տեղաշարժեր կան սպառազինության շուկայի դիվերսիֆիկացման հարցում, ադրբեջանական կողմից՝ նույնպես: Սակայն զենքի այն տեսակները, որոնք ձեռք են բերվել Ռուսաստանից, լրացնում են միմյանց, ինչը երաշխավորում է այն, որ կողմերից և ոչ մեկը պատրաստ չէ լայնամասշտաբ պատերազմ սկսելուն»,- Rusarminfo-ի հետ զրույցում ասել է ռուս ռազմական փորձագետը:

Կոնովալովը նաև նշել է, որ Ադրբեջանը զենք է գնում տարբեր երկրներից, քանի որ ֆինանսական մեծ ռեսուրսներ ունի, իսկ Հայաստանը Ռուսաստանից «մեծ բոնուսներ» է ստանում, և այդ իսկ պատճառով, ըստ նրա, հետագայում ևս կշարունակի օգտվել ռուսական ռազմական շուկայից: