Հինգշաբթի, 28 մարտի, 2024 թ.
|
Ստեփանակերտում`   +13 °C

Վրաստանի հայ համայնքը բաց նամակ է հղել ՀՀ վարչապետ Նիկոլ Փաշինյանին

Վրաստանի հայ համայնքը բաց նամակ է հղել ՀՀ վարչապետ Նիկոլ Փաշինյանին
1592
Չորեքշաբթի, 30 մայիսի, 2018 թ., 10:40

Մեծարգո պարոն վարչապետ,
Համայն աշխարհի հայերը, այդ թվում Հայաստանի Հանրապետությանը աշխարհագրորեն ամենամոտ գտնվող Վրաստանի հայությունը ուշիուշով հետևում և մասնակցում էին այն իրադարձություններին, որ արդեն պատմության մեջ են մտել որպես հայկական հեղափոխություն:

Լինելով հայ և միևնույն ժամանակ քաղաքացիներ Վրաստանի՝ այն երկրի, որ հեղափոխությունների վերջին տասնամյակների հարուստ փորձ ունի, աղոթում ենք առ Աստված, որ Հայաստանի Հանրապետության հասարակության համախմբման արդյունքում ձեռք բերված դրական լիցքը ծառայի հայկական պետականության, հայ ազգի զարգացմանն ու ամրապնդմանը, արդարացնելով հայ ազգի հույսերն ու սպասումները:
Հայաստանի Հանրապետության վարչապետի պաշտոնում կատարելով առաջին պաշտոնական այցը հարևան Վրաստան, Դուք մեզ հույս եք ներշնչում, որ Հայաստանի նոր ղեկավարությունը գիտակցում է վրացական պետության հետ
ճշմարիտ եղբայրական երկուստեք անհրաժեշտ հարաբերությունների հաստատման կարևորությունը: Միևնույն ժամանակ Մենք համոզված ենք, որ շարունակելով Վրաստանի հայության խնդիրների հանդեպ կանխակալ, անտեսման և անազնվության քաղաքականությունը, անհնար է հասնել հայ-վրացական միջպետական հարաբերությունների
որակական փոփոխությունների:
Վրաստանի հայությունը կարող է և պետք է դառնա այն անհրաժեշտ գործոնը, որը կապահովի հայ և վրաց
ժողովուրդների երկարաժամկետ կենսական անհրաժեշտության շահերի իրագործումը և կաջակցի ճշմարիտ եղբայրական, փոխշահավետ և մեկը մյուսին լրացնող հայ-վրացական միջպետական հարաբերությունների կյանքի կոչմանը:
Ուժեղ, արդար, անվտանգ Հայաստանը նույնքան անհրաժեշտ է Վրաստանին, որքան և ուժեղ, արդար, անվտանգ Վրաստանը անհրաժեշտ է Հայաստանին:

Վրաստանի Հայ Համայնք