Մերկելը Վրաստանում է

Գերմանիայի կառավարության ինքնաթիռը պլանավորվածից 15 րոպե շուտ վայրէջք է կատարել Թբիլիսիի Շոթա Ռուսթավելիի անվան միջազգային օդանավակայանում, Թբիլիսիի ժամանակով ժամը 14:15-ին:

«Շատ կարևոր, կարելի է ասել պատմական այց է: Հաշվի առնելով այն, որ վերջին անգամ տիկին կանցլերը Վրաստանում էր 10 տարի առաջ: Այդ ժամանակ նա ընդամենը մի քանի ժամ մնաց Վրաստանում: Գերմանիան սատարում է Վրաստանի տարածքային ամբողջականությունն ու ինքնիշխանությունը, ինչպես նաև այն բարեփոխումները, որոնք իրականացնում է Վրաստանը»,- լրագրողների հետ զրույցում ասել է Վրաստանի ԱԳ նախարար Դավիթ Զալքալիանին:

Նախատեսվում են բանակցություններ Մերկելի և Վրաստանի վարչապետ Մամուկա Բահթաձեի, ապա նախագահ Գեորգի Մարգվելաշվիլիի միջև:

«Բնականաբար, կքննարկվեն հարցեր, որոնք առավել կակտիվացնեն երկու երկրների հարաբերությունները: Խոսքը ինչպես առևտրատնտեսական, այնպես էլ մշակութային-մարդասիրական կապերի մասին է: Կքննարկվեն այն բոլոր հարցերը, որոնք կօգնեն Վրաստանին ինտեգրվել եվրոպական կառույցներում»,- ասել է Վրաստանի նախագահի՝ միջազգային հարաբերությունների հարցերով խորհրդական Թենհիզ Փհալաձեն:

Հիշեցնենք, որ տարածաշրջան եռօրյա այցի շրջանակներում վաղը Գերմանիայի կանցլեր Անգելա Մերկելը կժամանի Հայաստան: