«ՀԱՊԿ գլխավոր քարտուղարի պաշտոնը պետք է մնա Հայաստանին». Զոհրաբ Մնացականյան 

ՀՀ արտաքին գործերի նախարարի պաշտոնակատար Զոհրաբ Մնացականյանը հարցազրույց է տվել ТАСС պարբերականին, որում խոսել է Հավաքական անվտանգության պայմանագրի կազմակերպություն (ՀԱՊԿ) գլխավոր քարտուղարի պաշտոնի շուրջ ստեղծված իրավիճակի, ինչպես նաև Մոսկվայի, Վաշինգթոնի և Թեհրանի հետ Հայաստանի հարաբերությունների զարգացման մասին:

Ռուսական պարբերականի լրագրողը հիշեցրել է, որ Ղազախստանի մայրաքաղաք Աստանայում նախագահ Նուրսուլթան Նազարբաևը հայտարարեց, որ ՀԱՊԿ գլխավոր քարտուղարի պաշտոնը, ռոտացիայի սկզբունքով, ըստ այբբենական կարգի, պետք է անցնի Բելառուսին, իսկ ավելի ուշ հայտարարեց, որ հարցը կքննարկվի դեկտեմբերի 6-ին Սանկտ Պետերբուրգում: «Արդյո՞ք դա նշանակում է, որ Հայաստանն այլևս հնարավորություն չունի այդ պաշտոնին իր թեկնածուին առաջարկել»,- հարց է ուղղել լրագրողը:

«ՀԱՊԿ-ն անվտանգության ոլորտում 6 գործընկերների ռազմաքաղաքական համագործակցության հարթակ է: ՀԱՊԿ գլխավոր քարտուղարի պաշտոնը պետք է մնա Հայաստանին, և դրա համար կադրային լավ ներուժ կա: Որպես ՀԱՊԿ անդամ՝ մենք շահագրգիռ ենք լինել հզոր կազմակերպությունում, և այդ գործում մեր ներդրումն ունենք»,- ասել է Զ. Մնացականյանը՝ նշելով, որ ՀԱՊԿ գործող գլխավոր քարտուղարի իրավասությունները դադարեցվել էին ներքին բնույթի իրավական խնդիրների պատճառով: «Այնպես որ, ասեմ, ոչ, չի նշանակում: ՀԱՊԿ կազմում 6 անդամ կա, և որոշումներն ընդունվում են կոնսենսուսով»,- հարցին պատասխանել է Զ. Մնացականյանը:

Լրագրողը շարունակել է թեման՝ հետաքրքրվելով՝ արդյոք կան փաստաթղթերի հետ կապված խնդիրներ: «Կրկնում եմ՝ կազմակերպության կազմում կա հավասար իրավունքներ ունեցող 6 անդամ, որոնց համագործակցում են միմյանց հետո կոնսենսուսի հիմքով՝ ընդհանուր նպատակների հասնելու համար»,- պատասխանել է ՀՀ արտաքին գործերի նախարարի պաշտոնակատար Զոհրաբ Մնացականյանը: