«Որոշումը պետք է ստորագրեն բոլոր 6 պետությունների ղեկավարները». ՀԱՊԿ-ն պարզաբանում է

1118

Ուրբաթ, 21 դեկտեմբերի, 2018 թ., 17:00

Հավաքական անվտանգության պայմանագրի կազմակերպության (ՀԱՊԿ) նոր գլխավոր քարտուղարի նշանակման մասին որոշման ստորագրման ժամկետները դեռևս հստակ չեն, փաստաթուղթը պետք է ստորագրեն բոլոր 6 անդամ պետությունները: Այս մասին РИА Новости-ին ասել է ՀԱՊԿ մամուլի քարտուղար Վլադիմիր Զայնետդինովը:
«Որոշումը պետք է ստորագրվի բոլոր 6 անդամ պետությունների կողմից: Գլխավոր քարտուղար պետք է նշանակվի կոնսեսուսով, 6 պետությունների ղեկավարների կողմից»,- ասել է նա:

Զայնետդինովը պատասխանել է նաև այն հարցին, թե արդյոք Բելառուսի նախագահից բացի, մյուս երկրների ղեկավարներից որևէ մեկը ստորագրել է գլխավոր քարտուղարի նշանակման որոշումը: «Այդ առնչությամբ որևէ տեղեկություն չունեմ»,- ասել է ՀԱՊԿ մամուլի քարտուղարը:

Ավելի վաղ Բելառուսի նախագահ Ալեքսանդր Լուկաշենկոն Բելառուսի Անվտանգության խորհրդի քարտուղար Ստանիսլավ Զասին կազմակերպության գլխավոր քարտուղարի պաշտոնում նշանակելու մասին որոշման նախագիծ էր ստորագրել: Ստանիսլավ Զասն, իր հերթին, հայտարարել էր, որ պատրաստ է հանդիպել Հայաստանի ղեկավարության հետ: