«Ադրբեջանում սպասում են հայ-ռուսական հարաբերությունների վատթարացմանը». Ադրբեջանի նախկին արտգործնախարար

Ադրբեջանի նախկին արտգործնախարար Թոֆիք Զուլֆուգարովն առաջարկել է սպասել հայ-ռուսական հարաբերությունների վատթարացմանն ու անցնել Լեռնային Ղարաբաղի հակամարտության կարգավորման ռազմական տարբերակին:

Ադրբեջանական լրատվամիջոցների փոխանցմամբ՝ Զուլֆուգարովը հայտարարել է, որ «երկու կողմերի դիրքորոշումները հստակ են, և կողմերից որևէ մեկը միջանկյալ դիրքորոշման կամ փոխզիջումային տարբերակի հնարավորություն չի տեսնում»:

«Ադրբեջանի նախագահի և արտաքին գործերի նախարարի հայտարարությունների միջև տարբերություն կա: Նախագահն իր հայտարարության մեջ շեշտը դնում է նրա վրա, որ Հայաստանում փոփոխություններ են տեղի ունեցել, և հայ հասարակությունն ընտրելով Նիկոլ Փաշինյանին՝ ընտրություն է կատարել զարգացման արևմտամետ ուղու օգտին: Զարգացման համար ռուսական կողմը Հայաստանին երաշխիքներ չի կարող տալ: Այդ իսկ պատճառով կարծում եմ, որ վաղ թե ուշ Հայաստանը կհրաժարվի Ռուսաստանի հետ համագործակցությունից»,- կարծիք է հայտնել նա: