Պուտինն ու Լուկաշենկոն կրկին կհանդիպեն

Ռուսաստանի և Բելառուսի նախագահներ Վլադիմիր Պուտինն ու Ալեքսանդր Լուկաշենկոն կհանդիպեն վաղը՝ դեկտեմբերի 29-ին, Մոսկվայում: Այս մասին հայտնում է Բելառուսի նախագահի մամուլի ծառայությունը:

Երկու երկրների առաջնորդները կշարունակեն նախորդ հանդիպման օրակարգում տեղ գտած թեմաների քննարկումը:

«Վաղն ըստ պայմանավորվածության աշխատանքային այցով Մոսկվա կժամանի Բելառուսի նախագահ Ալեքսանդր Լուկաշենկոն: Հենց վաղը կկայանան Պուտին-Լուկաշենկո բանակցությունները, կշարունակվի այն թեմաների քննարկումը, որոնք առկա էին նախորդ հանդիպման օրակարգում»,- РИА Новости-ի փոխանցմամբ, ասել է ՌԴ նախագահի մամուլի խոսնակ Դմիտրի Պեսկովը:

Նշենք, որ նախորդ հանդիպումը կայացել էր դեկտեմբերի 25-ին Կրեմլում: Բելառուսի նախագահի մամուլի քարտուղարը հայտնել էր, որ Պուտինն ու Լուկաշենկոն գազի գնի վերանայման շուրջ համաձայնության չեն հասել: