Հայկ Ալումյանը պարզաբանում է՝ ինչու են դիմել Սահմանադրական դատարան (տեսանյութ)

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը, խոսելով Սահմանադրական դատարան դիմելու պատճառների մասին, լրագրողների հետ զրույցում ասել է. «Մենք գտնում ենք, որ պրն Քոչարյանը հիմա ընդհանրապես կալանքի տակ չպետք է լիներ, բայց քանի որ մենք դիմել ենք Վճռաբեկ դատարան այդ հարցով և դեռ պարզ չէ, թե երբ հարցին Վճռաբեկ դատարանը լուծում կտա, էսպես միջանկյալ միջոց է մեր կողմից, դիմեցինք Առաջին ատյանի դատարան, որ առայժմ գրավ կիրառվի, իսկ մնացած հարցերը Վճռաբեկ դատարանում իրենց լուծումը կստանան: Սահմանադրական դատարան դիմում են, եթե գտնում են, որ օրենքը հակասում է Սահմանադրությանը: Տվյալ դեպքում մենք նկատի ունենք, որ Վճռաբեկ դատարանը չպետք է վարույթ ընդուներ գլխավոր դատախազի վճռաբեկ բողոքը: Մենք ՍԴ-ում վիճարկելու ենք օրենքի այն բացը, որը հնարավորություն է տալիս անձեռնմխելիության հետ կապված էսպիսի մտավարժանքներ անել տարբեր դատական ատյաններում, և վերջիվերջո այսպիսի բացասական արդյունքի գալ»: Խոսելով ակնկալվող որոշման մասին՝ Հայկ Ալումյանն ասել է. «Հույս ունեմ, որ այսօր կավարտվի, որովհետև շատ ծավալուն քննարկման խնդիր չի»: