«Զուգադիպությո՞ւն է եղել, թե՞ քաղաքական մտածված քայլ». Արա Պապյան

Դիվանագետ Արա Պապյանը ֆեյսբուքյան իր էջում գրել է. «Չգիտեմ, թե պատահական զուգադիպությո՞ւն է եղել, քաղաքական մտածված քա՞յլ, թե՞ նախախնամություն՝ Մեծ եղեռնի զոհերի հուշարձանի կառուցման որոշումը ՀՍՍՀ նախարարների խորհուրդն ընդունել է 1965թ. մարտի 16-ին: Այսինքն, այն նույն օրը, որն ընդունված է համարել 1921թ.-ի Մոսկվայի քեմալա-բոլշևիկյան պայմանագրի ստորագրման օրը:

Ի դեպ, այս փաստատթուղթը միանշանակորեն ցույց է տալիս, որ հուշարձանի կառուցման որոշումը նախորդել է 1965թ. ապրիլի 24-ի երևանյան ցույցերին և չի եղել պայմանավորված դրանցով:

ՀԽՍՀ ՆԱԽԱՐԱՐՆԵՐԻ ԽՈՐՀՐԴԻ ՈՐՈՇՈՒՄԸ
1915 ԹՎԱԿԱՆԻ ԵՂԵՌՆԻ ԶՈՀԵՐԻ ՀԻՇԱՏԱԿԸ
ՀԱՎԵՐԺԱՑՆԵԼՈՒ ՀԱՄԱՐ ԿՈԹՈՂ ԿԱՌՈԻՑԵԼՈՒ ՄԱՍԻՆ

16 մարտի 1965թ., Երեւան

Հայկական ՍՍՌ Մինիստրների սովետը ՈՐՈՇՈՒՄ է.
1. Սուլթանական Թուրքիայի կառավարողների կազմակերպած hայկական կոտորածների Հիսնամյակի կապակցությամբ, ընդառաջելով ռեսպուբլիկայի աշխատավորների ու հասարակական կազմակերպությունների ցանկություններին, Երևան քաղաքում կանգնեցնել կոթող՝ ի հավերժացումն 1915 թվականի եղեռնի զոհերի հիշատակի:
2. Հանձնարարել Հայկական ՍՍՌ Պետշինին հայտարարել կոթողի լավագույն նախագծի մրցանակաբաշխություն: Մրցանակաբաշխության ժամկետ սահմանել մեկ ամիս սկսած հայտարարության օրվանից:
3. Առաջարկել Երևանի քաղաքային սովետի գործկոմին անհրաժեշտ նախապատրաստական աշխատանք կատարել և կոթողի կառուցումն ավարտել 1965 թվականին:

Հայկական ՍՍՌ Մինիստրների սովետի նախագահ՝ Ա. Քոչինյան

Հայկական ՍՍՌ Մինիստրների սովետի գործերի կառավարիչ՝ Հ. Մելքոնյան

Ֆ .113, ց.96, գ.88, թ.2: Բնագիր: Մ ե ք ե ն ա գ ի ր:
Բանբեր Հայաստանի արխիվների, 2005, #1 (105), էջ 52-53