ՀԱՊԿ միացյալ շտաբի պետը՝ Արցախում լարվածության նվազեցման մասին

ՀԱՊԿ միացյալ շտաբի պետ, գեներալ-գնդապետ Անատոլի Սիդորովը «Sputnik Արմենիա» մամուլի կենտրոնում տեղի ունեցած տեսակամրջի ժամանակ հայտարարել է, որ Արցախում հաջողվել է լարվածության որոշակի նվազեցման հասնել:

Նրա խոսքով՝ միջազգային միջնորդների և տարածաշրջանի պետությունների համատեղ ջանքերը վերջին ամիսներին հանգեցրել են լարվածության նվազեցմանը:

«Հայաստանի և Ադրբեջանի ղեկավարության՝ մշտական դարձած հանդիպումները թույլ են տալիս որոշակի համաձայնությունների հասնել, որոնք ուղղված են վստահության ամրապնդմանն ու խաղաղ գործընթացի համար պայմաններ ստեղծելուն: Վերջին տասնամյակի ընթացքում առաջին անգամ բարձր մակարդակով ուղիղ կապ հաստատվեց»,- ասել է Սիդորովը:

Միևնույն ժամանակ, գեներալի կարծիքով, կովկասյան տարածաշրջանում բարդ իրավիճակ է պահպանվում:

Գեներալը խոսել է նաև ՀԱՊԿ նոր գլխավոր քարտուղար նշանակման մասին՝ վստահություն հայտնելով, որ «ճիշտ որոշում կկայացվի»: