Կիրականացվեն աշխատանքներ` Շուշիի վտանգված հուշարձանները պահպանելու նպատակով

1623

Չորեքշաբթի, 13 փետրվարի, 2019 թ., 18:05

2019-ին նախատեսվում է իրականացնել մի շարք աշխատանքներ Շուշիի վտանգված հուշարձանները պահպանելու նպատակով: «Արցախպրես»-ի հաղորդմամբ՝ այս մասին նախօրեին կայացած մամուլի ասուլիսի ժամանակ ասել է ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը՝ ընդգծելով, որ ներկայումս Շուշիում հայկական քաղաքային ճարտարապետությանը բնորոշ շենք-շինություններ կան, որոնք անհետաձգելիորեն կոնսերվացման և մասնակի վերականգնման կարիք ունեն: «Այս տարի մեկնարկելու են այդ աշխատանքները: Մասնավորապես՝ Գարեգին Նժդեհ փողոցում առկա է վթարային վիճակում գտնվող կառույց, որը վտանգ է ներկայացնում հարևանությամբ ապրող բնակիչների համար: Շուշիում այդ աշխատանքը կրելու է շարունակական բնույթ: Արևելյան Հայաստանի տարածքում ունենք երկու քաղաք, որոնք աչքի են ընկնում քաղաքային ճարտարապետությամբ: Այդ քաղաքները Գյումրին և Շուշին են: Շուշիում այդ ճարտարապետությունը պահպանելու խիստ անհրաժեշտություն այսօր կա»,- ավելացրել է Լ. Հովհաննիսյանը: