Մամեդյարովն Արթուր Վանեցյանի հայտարարությունից հետո զանգել է ԵԱՀԿ ՄԽ ռուս համանախագահին

Ադրբեջանի արտգործնախարար Էլմար Մամեդյարովը ՀՀ ԱԱԾ տնօրեն Արթուր Վանեցյանի՝ Ստեփանակերտում արած հայտարարությունից հետո զանգել է ԵԱՀԿ ՄԽ ռուս համանախագահ Իգոր Պոպովին, գրում են ադրբեջանական լրատվամիջոցները:

«Հայաստանի ղեկավարության վերջին հայտարարություններն ուղղված չեն խաղաղությանը: Օրինակ, ԱԱԾ տնօրենի վերջին հայտարարությունը: Տվյալ հարցով այսօր խոսել եմ ԵԱՀԿ Մինսկի խմբի ռուս համանախագահի հետ»,- ասել է Մամեդյարովն այսօր տեղի ունեցած մամուլի ասուլիսի ժամանակ:

Նա նաև ԵԱՀԿ գործող նախագահ, Սլովակիայի ԱԳՆ ղեկավար Միրոսլավ Լայչակին խնդրել է մյուս շաբաթ Երևան այցի ժամանակ Հայաստանի ղեկավարությանը տվյալ հարցն ուղղել. «Մեր ժողովուրդներին նախապատրաստելու ենք խաղաղությա՞նը, թե՞ այլ ուղղությամբ»:

Հիշեցնենք, որ երեկ ԱԱԾ տնօրենը հայտարարել է. «Իմ գործը Հայաստանի և Արցախի անվտանգության համակարգի նկատմամբ որևէ ոտնձգություն թույլ չտալն է»: Հիշեցնենք նաև, որ օրեր առաջ Արցախ կատարած այցի ընթացքում Արթուր Վանեցյանը հայտարարել էր. «Ոչ մի թիզ հող հետ հանձնելու նպատակ չունենք, և մեր հողերում պետք է բնակվեն մեր հայրենակիցները և շենացնեն մեր երկիրը»: Այս հայտարարությունը քննարկման թեմա էր դարձել մամուլում, արձագանք էր եղել նաև Ադրբեջանից: