«Թուրքիան ԱՄՆ-ից ավելի շահավետ առաջարկ է ստացել». թուրք նախարար

Թուրքիայի պաշտպանության նախարար Հուլուսի Աքարը հայտարարել է, որ Թուրքիան, Patriot հակահրթիռային համակարգերի հետ կապված, ԱՄՆ-ից «ավելի շահավետ» առաջարկ է ստացել, քան նախկինում: Այս մասին հաղորդում է РИА Новости-ն:

«Patriot-ի առնչությամբ ԱՄՆ-ի արած առաջարկությունը, որը ստացել ենք մարտին, ավելի շահավետ է ու պահպանում է այն դիրքորոշումները, որոնց մասին ի սկզբանե ասել էինք: Մենք պատրաստվում ենք ոչ միայն գնել, այլև արտադրել մեր սեփական օդային պաշտպանության համակարգերը»,- ասել է Աքարը՝ NTV-ի ուղիղ եթերում:

Ապրիլին Թուրքիայի պաշտպանության նախարարը հայտարարեց, որ Թուրքիան Patriot-ի հրթիռների հետ կապված ԱՄՆ-ից նոր առաջարկ է ստացել:

Հիշեցնենք՝ Թուրքիան բազմիցս է հայտարարել, որ, եթե նույնիսկ այդ գործարքը կայանա, չեն հրաժարվելու Ս-400-ներից: ԱՄՆ-ը հայտարարում է, որ Ս-400 համակարգերը անհամատեղելի են ՆԱՏՕ չափորոշիչների հետ, և որ կարող է ձգձգել կամ չեղարկել Թուրքիային նորագույն F-35 ինքնաթիռների վաճառքը: