Սալոմե Զուրաբիշվիլին՝ վրաց-ադրբեջանական սահմանի լարվածության մասին

Վրաստանի նախագահ Սալոմե Զուրաբիշվիլին քննադատել է նրանց, ովքեր փորձել են լարվածություն ստեղծել վրաց-ադրբեջանական սահմանի վիճելի հատվածների շուրջ, հաղորդում է Sputnik-georgia-ն: «Վերջին օրերին աժիոտաժ է նկատվում մի շարք հարցերի շուրջ, որոնց վերաբերյալ երկու երկրները որոշումներ են կայացնում հանձնաժողովի շրջանակներում՝ բանակցությունների ճանապարհով: Այստեղ նա, ով ուզում է մեզ այլ ճանապարհով տանել, անցյալում է: Անցյալ, որին մենք չենք վերադառնա: Այս քաղաքական մանիպուլյացիաները կվնասեն երկու երկրներին, կվտանգեն Կովկասի խաղաղությունը, կայունությունն ու զարգացումը: Սա ոչ ոքի ձեռնտու չէ, և մենք հրաշալի կերպով հասկանում ենք սա, այդ պատճառով էլ համատեղ պայքարով հանդես ենք եկել՝ վերջնական նպատակին հասնելու համար»,- հայտարարել է Զուրաբիշվիլին:

Հիշեցնենք, որ «Դավիթ Գարեջիի» վանական համալիրի մոտակայքում Ադրբեջանի կողմից նոր ճանապարհի կառուցումը վրաց-ադրբեջանական սահմանում լարվածության առաջացման պատճառ է դարձել: