«Այս գործն ունի այնքան քաղաքական կյանք, որքան կյանք ունեն այս իշխանությունները». Վիկտոր Սողոմոնյան

«Այս գործն ունի այնքան քաղաքական կյանք, որքան կյանք ունեն այս իշխանությունները: Դուք հիշում եք Դաշնակցության պատմությունը՝ 1994-95թթ, ինչքան տևեց գործը, քանի կոպեկ արժեր»,- հուլիսի 29-ին լրագրողների հետ հանդիպմանն ասաց Հայաստանի երկրորդ նախագահի գրասենյակի ղեկավար Վիկտոր Սողոմոնյանը:

Հիշեցնենք, որ մեկ տարի առաջ Երևան քաղաքի ընդհանուր իրավասության դատարանը ՀՀ 2-րդ նախագահին կալանավորելու որոշում կայացրեց:

Սողոմոնյանը հայտարարեց, որ Մարտի 1-ի գործը չի բացահայտվել՝ ի հեճուկս վարչապետի հայտարարության, թե այն արդեն բացահայտված է:

«Այն, ինչ ինքն նկատի ուներ, բացարձակ սուտ է: Այս 1 տարվա ընթացքում մանիպուլյատիվ գործոնը մեծ տեղ է գրավել»,- հայտարարեց բանախոսը:

Նա հերթական անգամ պնդեց, որ քաղաքական հետապնդում է իրականացվում քրեական քողի տակ՝ անձամբ ՀՀ վարչապետ Նիկոլ Փաշինյանի կողմից: Նա նշեց, որ մեկ տարի առաջ չէին կարող ենթադրել, որ «ապօրինություններն այս չափերի են հասնելու»:

Սողոմոնյանը ներկայացրեց նաև փաստաբանների կողմից տրամադրված իր իսկ բնորոշմամբ 29 կետից բաղկացած խախտումների ցանկը: Ռ. Քոչարյանը հարցաքննության է հրավիրվել որպես վկա, հետո մի քանի օրում նրա կարգավիճակը փոխվել է: Ըստ բանախոսի՝ մի քանի օրում չէր կարող որևէ բան փոխվել, որ վկայից մեղադրյալ դառնար:

«Քոչարյանին մեղադրանք է առաջադրվել մի հանցանքի համար, որը տվյալ պահին հանցագործություն չի հանդիսացել: Անկյունաքարային հանգամանքը՝ Ռ. Քոչարյանին առաջադրված մեղադրանքը երբևէ չի պարզաբանվել: Դրանում առկա անորոշ ձևակերպումները երբեք չեն հստակեցվել: Մեղադրանքի անհստակությունն անտեսվել է խափանման միջոցի քննության ժամանակ դատարանների կողմից, չնայած թե՛ Քոչարյանի, թե՛ նրա փաստաբանների կողմից գրավոր պահանջ եղել է»,- նշեց ՀՀ 2-րդ նախագահի գրասենյակի ղեկավարը:

Նրա վկայությամբ՝ պատմության մեջ առաջին անգամ Ռ. Քոչարյանի պաշտպանական կողմին ելույթ ունենալու հնարավորություն չի տրվել:

Սողոմոնյանը խայտառակություն որակեց Ռ. Քոչարյանի գործը քննած դատավորի հանդեպ գործ հարուցելը: