«Մենք ունենալու ենք Եվրոպական դատարանի վճիռներ, չեմ կասկածում՝ դրանք Ռ. Քոչարյանի օգտին են լինելու». Վ. Սողոմոնյան

«Մենք այսօր տեսնում ենք Վենետիկի հանձնաժողովի եզրակացությունը, ունեցել ենք ՌԴ ԱԳՆ հայտարարությունը, դեռևս ունենալու ենք Եվրոպական դատարանի վճիռներ, ես չեմ կասկածում, որ դրանք Ռ. Քոչարյանի օգտին են լինելու». հուլիսի 29-ին լրագրողների հետ հանդիպմանն ասաց Հայաստանի երկրորդ նախագահի գրասենյակի ղեկավար Վիկտոր Սողոմոնյանը:

Նա նկատեց, որ իշխանությունները տխուր հանգրվանի են հասել, որովհետև գործի հիմքում կեղծիք է դրված:

Վ. Սողոմոնյանը նշեց, որ երբ ինքն անցյալ տարի հուլիսի 3-ին առաջին անգամ կարդացել է ՀՔԾ հաղորդագրությունը, «իրեն բռնացրել է» այն մտքի վրա, որ ինչ-որ ծանոթ տեքստ է կարդում: «Հետո հասկացա՝ որտեղ կարող էր լինել, բացեցի Տեր-Պետրոսյանի ելույթները (2008թ. մայիս) և տեսա բացարձակ նույն ձևակերպումները»,- հայտարարեց Վ. Սողոմոնյանը:

Նա կրկին պնդեց, որ գործը հեռանկար չունի, Ռ. Քոչարյանն արդարացվելու է և ազատ է արձակվելու: ՀՀ-ն որպես պետություն բազմաթիվ հարվածներ ստացավ, նախկին նախագահի ապօրինի հետապնդումը չի կարող անհետևանք մնալ: «Կալանքի տակ է մի մարդ, որը Լեռնային Ղարաբաղում հաղթանակ է տարել, տնտեսական հաջողություններ է գրանցել»,- գնահատեց բանախոսը: