Կիրակի, 22 սեպտեմբերի, 2019 թ.
|
Ստեփանակերտում`   +12 °C

Հայտնի են Պուտինի և Մակրոնի հեռախոսազրույցի մանրամասները

Հայտնի են Պուտինի և Մակրոնի հեռախոսազրույցի մանրամասները
99
Երկուշաբթի, 09 սեպտեմբերի, 2019 թ., 15:20

Ռուսաստանի նախագահ Վլադիմիր Պուտինը կիրակի հեռախոսացրույց է ունեցել Ֆրանսիայի նախագահ Էմանուել Մակրոնի հետ. այս մասին հաղորդում է ՌԴ նախագահի մամլո ծառայությունը։ Հեռախոսազրույցի ընթացքում Ֆրանսիայի նախագահը ողջունել է կալանավորված անձանց փոխանակումը, ինչպես նաև կողմերը վերահաստատել են «նորմանդական ձևաչափով» աշխատանքները շարունակելու իրենց մտադրությունը, կողմ են արտահայտվել իրանական «միջուկային գործարքի» շուրջ ուժերը միավորվելու օգտին։ Ինչպես նշվում է, Պուտինն ու Մակրոնը «դրական գնահատական են տվել սեպտեմբերի 7-ին Ուկրաինայի և Ռուսաստանի միջև բանտարկյալների ազատ արձակման և տեղափոխման վերաբերյալ՝ այն գնահատելով որպես կարևոր հումանիտար քայլ»: Ֆրանսիայի նախագահը նաև հույս է հայտնել, որ դա կնպաստի ռուս-ուկրաինական հարաբերությունների կարգավորմանը:
«Հեռախոսազրույցի ընթացքում ուկրաինական կոնֆլիկտի վերաբերյալ շեշտվել է Մինսկի միջոցների փաթեթի ոչ այլընտրանքային բնույթը, որը կարգավորման հիմք է հանդիսանում: Հաստատվել է «նորմանդական ձևաչափով» կառուցողական համատեղ աշխատանքը շարունակելու փոխադարձ պարտավորությունը»,- ասված է հայտարարության մեջ:
Կրեմլը նշել է, որ Պուտինը կոչ է արել մանրակրկիտ պատրաստել «նորմանդական ձևաչափով» հաջորդ գագաթնաժողովի օրակարգը, ինչպես նաև մշակել հարցեր, որոնք կարող են հաստատել քառյակ երկրների ղեկավարները հանդիպումից հետո: Իր հերթին, Ելիսեյան պալատը հայտնել է, որ Պուտինն ու Մակրոնը զրույցի ընթացքում մատնանշել են առաջիկա շաբաթների ընթացքում կայանալիք «նորմանդյան քառյակի» գագաթնաժողովը գումարելու նախադրյալները: Բացի այդ, ըստ Կրեմլի, հեռախոսազրույցի ընթացքում կողմերը քննարկել են իրանական միջուկային ծրագրի շուրջ ստեղծված իրավիճակը:
«Պետությունների ղեկավարները պայմանավորվել են շարունակել շփումներն ինչպես հեռախոսային, այնպես էլ անձնական հանդիպումների ընթացքում»,- եզրափակում է ՌԴ մամուլի ծառայությունը: