Ադրբեջանի ԿԸՀ-ն սկսել է ընդունել պատգամավորության թեկնածուների փաստաթղթերը

Ադրբեջանում շրջանային ընտրական հանձնաժողովները դեկտեմբերի 21-ից սկսել են և մինչև 2020թ հունվարի 20-ը կշարունակեն ընդունել խորհրդարանի պատգամավորության թեկնածուների գրանցման համար անհրաժեշտ փաստաթղթերը: Այդ մասին գրում է ՏԱՍՍ գործակալությունը: Միլլի Մեջլիսի արտահերթ ընտրությունները պետք է տեղի ունենան 2020թ. փետրվարի 9-ին: Ադրբեջանի ԿԸՀ-ի տվյալներով՝ ընտրություններին մասնակցության մասին է հայտարարել 15 կուսակցություն, այդ թվում՝ իշխող «Ենի Ազերբայջանը»: Ընտրությունները բոյկոտելու մասին է հայտնել «Ժողովրդավարական ուժերի ազգային խորհուրդ» (ԺՈՒԱԽ) միավորումը, որի կազմում են ընդդիմադիր մի քանի կուսակցություններ:

Հիշեցնենք, որ նոյեմբերի վերջին 5-րդ գումարման Միլի Մեջլիսի արձակման նախաձեռնությամբ հանդես եկավ իշխող խմբակցությունը: Խորհրդարանի արձակումը հիմնավորվել էր երկրի նախագահի քաղաքական կուրսին աջակցելու և խորհրդարանի կազմը երիտասարդացնելու անհրաժեշտությամբ:

Ալիևը խորհրդարանի արձակման հրամանագիրը ստորագրել էր դեկտեմբերի 5-ին: Երկրի Սահմանադրությամբ՝ Միլլի Մեջլիսը բաղկացած է 125 պատգամավորից, որոնք ընտրվում են 5 տարի ժամկետով՝ համընդհանուր և ուղիղ ընտրությունների միջոցով: 5-րդ գումարման խորհրդարանը ձևավորվել էր 2015թ. նոյեմբերի 1-ին: