«2020թ. պետք է լինի պայքար՝ արտահերթ ընտրությունների անցկացման համար». Շարմազանով

«2008-ին Արևմուտքի համար ցանկալի թեկնածուն Սերժ Սարգսյանն է եղել, ով խոստումներ է տվել»,- այս մասին օրեր առաջ գրառում էր կատարել քաղաքագետ Ստեփան Դանիելյանը: Այսօր՝ լրագրողների հետ հանդիպման ժամանակ, ՀՀԿ խոսնակ Էդուարդ Շարմազանովն արձագանքել է այդ գրառմանը. «Դա անհեթեթություն է, մառազմ, զավեշտ. Սերժ Սարգսյանը հայաստանակենտրոն գործիչ է, նա որևէ մեկին, բացի իր ժողովրդից, որևէ խոստում չի տվել»:

ԱԺ նախկին փոխնախագահը, ի թիվ ներքաղաքական այլ հարցերի, անդրադարձավ այսօրվա խորհրդարանի աշխատանքին: «ՀՀ անկախության պատմության մեջ երբեք որևէ անձ կամ կուսակցություն մանդատների 3/5-րդին չի տիրացել: Երբ մենք իշխանության էինք, սահմանադրական օրենք ընդունելու համար մեզ անհրաժեշտ էր բանակցել ընդդիմության հետ, այդ թվում՝ Ն. Փաշինյանի: Էսօր Էդմոն Մարուքյանն ու Գագիկ Ծառուկյանն իրենց թիմերով ինչքան էլ խոսեն, որևէ բան չի լինելու: Նիկոլ Փաշինյանին ցանկացած որոշում անցկացնելու համար անհրաժեշտ է 80 ձայն, ինքն ունի 88 պատգամավոր: Մեզ անհրաժեշտ է 2020-ին արտահերթ ընտրություններ, նրա համար չեմ ասում, որ ՀՀԿ-ն վերադառնա իշխանության, այլ որ մեր պառլամենտը դեֆորմացված չլինի»,- հայտարարեց Շարմազանովը: