Պուտինը և Մակրոնը պայմանավորվել են շարունակել շփումներն Իրաքում տիրող իրավիճակի շուրջ

Ռուսաստանի և Ֆրանսիայի նախագահները՝ Վլադիմիր Պուտինը և Էմանուել Մակրոնը, հեռախոսազրույցի ընթացքում պայմանավորվել են կապի մեջ մնալ Իրաքում և տարածաշրջանում տիրող իրավիճակի շուրջ․ ՌԻԱ Նովոստի-ի փոխանցմամբ ասվում է Ելիսեյան Պալատի հաղորդագրության մեջ:
«Երկու երկրների նախագահները նախ քննարկել են Իրաքում և տարածաշրջանում ստեղծված իրավիճակը: Նրանք պայմանավորվել են առաջիկա օրերին մնալ շփման մեջ, որպեսզի խուսափեն լարվածության նոր սրացումից և բոլոր կողմերին զսպվածության կոչ են անում»,- ասվում է հայտարարության մեջ:
Նշվում է, որ Մակրոնը «հիշեցրել է Ֆրանսիայի նվիրվածությունը Իրաքի ինքնիշխանությանը և անվտանգությանը և տարածաշրջանում կայունությանը»:
«Նա (Մակրոնը), շեշտել է 2015-ի պայմանագրի կարևորությունը՝ հորդորելով Իրանին արագ վերադառնալ իր միջուկային պարտավորությունների լիարժեք կատարմանը և զերծ մնալ ցանկացած սադրանքներից»,- հաղորդում են Ֆրանսիայի առաջնորդի վարչակազմից։