Երեքշաբթի, 29 սեպտեմբերի, 2020 թ.
|
Ստեփանակերտում`   +15 °C

#DeutscheWelle-ի անդրադարձը՝ ՀՀ-ում սահմանադրական հանրաքվեին

#DeutscheWelle-ի անդրադարձը՝ ՀՀ-ում սահմանադրական հանրաքվեին
341
Ուրբաթ, 07 փետրվարի, 2020 թ., 12:50

Սահմանադրական հանրաքվեն Հայաստանում կանցկացվի գարնանը, որը ներառում է ՍԴ նախագահ Հրայր Թովմասյանի և 6 անդամների լիազորությունների դադարեցումը, անդրադարձ է կատարել գերմանական Deutsche Welle մեդիաընկերությունը: Փետրվարի 6-ին խորհրդարանն ընդունեց «ՀՀ Սահմանադրության փոփոխությունների նախագիծը հանրաքվեի դնելու մասին» որոշման նախագիծը: Ի պաշտպանություն այս որոշման՝ ելույթ ունեցավ վարչապետ Նիկոլ Փաշինյանը։ ԲՀԿ խմբակցությունը չմասնակցեց քվեարկությանը, իսկ «Լուսավոր Հայաստանը» դեմ քվեարկեց։ Ըստ «Իմ քայլը» խմբակցության ղեկավար Լիլիթ Մակունցի՝ հանրաքվեն կանցկացվի մարտի վերջից մինչև ապրիլի 5-ը ժամանակահատվածում: «Դա կախված է նրանից, թե երբ Հայաստանի նախագահը կստորագրի որոշումը»,-լրագրողների հետ ճեպազրույցում հայտարարեց Մակունցը:

Հիշեցնենք՝ նախագծի հեղինակներն առաջարկում են 1995 թվականի հուլիսի 5-ի Հայաստանի Հանրապետության Սահմանադրության՝ 2015 թվականի դեկտեմբերի 6-ի փոփոխություններով, 213-րդ հոդվածը, որը վերաբերում է Սահմանադրական դատարանի անդամների և նախագահի պաշտոնավարմանը, շարադրել նոր խմբագրությամբ. «Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է: Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Կառավարությունը, Հանրապետության նախագահը և դատավորների ընդհանուր ժողովը: Սույն հոդվածի 1-ին մասի հիման վրա մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների լիազորությունները համարվում են դադարած, իսկ առաջացած թափուր տեղերը համալրելու ժամկետները և այլ մանրամասները սահմանվում են «Սահմանադրական դատարանի մասին» օրենքով նախատեսված կարգով»:

Ըստ Deutsche Welle-ի՝ Հայաստանի իշխող կուսակցությունը՝ վարչապետ Փաշինյանի գլխավորությամբ, ձգտում է հասնել Սահմանադրական դատարանի նախագահի հրաժարականին՝ պնդելով, որ նախկին նախագահ Ռոբերտ Քոչարյանի գործի քննության ընթացքում կան խախտումներ։ Հոկտեմբերիի սկզբին խորհրդարանը որոշեց զրկել Թովմասյանին լիազորություններից՝ նամակ ուղարկելով Սահմանադրական դատարան, սակայն դատավորները հրաժարվեցին այդ նախաձեռնությունը դնել շրջանառության մեջ: Իսկ ավելի վաղ՝ սեպտեմբերին Սահմանադրական դատարանը որոշում կայացրեց երկրի նախկին նախագահ Քոչարյանին ձերբակալելու և կալանավորելու դատարանի որոշման դեմ։ Նոյեմբերին Երևանի ընդհանուր իրավասության դատարանը չենթարկվեց որոշմանը և Քոչարյանին թողեց կալանքի տակ, հավելում է լրատվամիջոցը: