Էրդողանը Թրամփից զինամթերք է խնդրել

Թուրքիայի նախագահ Ռեջեփ Էրդողանը մարտի 4-ին հայտնել է, որ ԱՄՆ նախագահ Դոնալդ Թրամփից խնդրել է զինամթերք՝ օգնության տեսքով՝ Իդլիբում մարտերի համար, հայտնում է NTV-ն: Այս մասին Էրդողանը հայտնել է ճեպազրույցի ընթացքում՝ մեկնաբանելով Սիրիայի հարցով ԱՄՆ հատուկ ներկայացուցիչ Ջեյմս Ջեֆրիի հայտարարությունը: Վերջինս նախօրեին հայտնել էր, որ Վաշինգթոնը պատրաստ կլինի Թուրքիային որպես ՆԱՏՕ-ի դաշնակից զինամթերք տրամադրել:

Մեկնաբանելով Իդլիբում «Գարնանային վահան» ռազմական գործողության ընթացքը, Էրդողանը խոստովանել է, որ Թուրքիան այս հակամարտության մեջ կրում է կորուստներ, որոնք, սակայն, «շատ փոքր են՝ համեմատած սիրիական կողմի կորուստների հետ»:

Էրդողանը նաև լրագրողների հետ խոսել է իր ակնկալիքների մասին՝ Ռուսաստանի նախագահ Վլադիմիր Պուտինի հետ առաջիկա բանակցությունների վերաբերյալ: Ըստ նրա՝ առաջին գերակայությունը կլինի հրադադարի սահմանումը: «Մինչ այժմ մենք Ռուսաստանից առաջարկներ չենք ստացել: Բանակցություններից հետո մենք Պուտինի հետ համատեղ մամուլի ասուլիս ենք անցկացնելու: Ինձ հետ մի խումբ լրագրողներ կմեկնեն Ռուսաստան, ուստի գաղտնիքներ չեն լինի»,- նշել է Էրդողանը: