«Ադրբեջանի ՊՆ այսօրվա հայտարարությունները բավականին տարբերվում են մնացածից»․ Կ․ Հովհաննիսյան

Քրդագետ, թուրքագետ Կարեն Հովհաննիսյանը ֆեսբուքյան իր էջում գրել է․ «Ադրբեջանի պաշտպանության նախարարի այսօրվա հայտարարությունները բավականին տարբերվում էին մնացած հայտարարություններից, որն անում էր նմանատիպ հանդիպումների ժամանակ: Բանակի հրամանատարների հետ հանդիպման ժամանակ Զաքիր Հասանովը մասնավորապես ասում է, որ «ռազմական գործողությունների վերսկսման հավանականությունը բարձր է»: Այնուհետև նա ցուցում է տալիս բանակի հրամանատարներին, որ ցանկացած պահի բոլորը պատրաստ լինեն «ճակատի բոլոր ուղղություններով մարտական գործողություններին»:
Ադրբեջանից միշտ գալիս են ազդակներ ռազմական գործողությունների վերսկսման մասին, սակայն, որպես կանոն, դրանք գալիս են ավելի շատ քաղաքական և փորձագիտական դաշտից: Բայց այս անգամ, հենց ռազմական գերատեսչության ղեկավարն է ուղիղ դրա մասին ասում: «Ռազմական գործողությունների վերսկսման հավանականությունը բարձր է» արտահայտությունը գոնե ապրիլյանից հետո բաց տեքստով, կամ հանրության համար հասանելի տարբերակով չէր ասվել Ադրբեջանի ռազմական ղեկավարության կողմից»: