Կկալանավորվի՞ Ծառուկյանը, թե՞ ոչ․ դատարանը գնացել է խորհրդակցական սենյակ

Երևանի ընդհանուր իրավասության դատարանի Շենգավիթի նստավայրում՝ նախագահությամբ դատավոր Ռոբերտ Պապոյանի, ավարտվեց «Բարգավաճ Հայաստան» կուսակցության առաջնորդ Գագիկ Ծառուկյանի կալանքի միջնորդության քննարկումը։

Դուրս գալով դատարանի շենքից՝ Գագիկ Ծառուկյանը տեղեկացրեց, որ դատարանը հեռացել է խորհրդակցական սենյակ՝ որոշում կայացնելու։ Այն կհրապարակվի կիրակի՝ հունիսի 21-ին, ժամը 15։00-ին։ «Այս հոդվածով մինչև այսօր, որ ինչ որ կալանավորելու, ձերբակալելու միջնորդություն ներկայացնեն ազգային օլիմպիական կոմիտեի նախագահին, քաղաքական երկրորդ ուժին․․․ մենակ մի բան կասեմ՝ եթե այս համաճարակի, աղքատության և տնտեսական անկման մեջ ես եմ մեղավոր, պատրաստ եմ ինքնակամ գնալու, պատիժ կրելու։ Նորից եմ ասում՝ ինձ համար զարմանալի է ամեն ինչը»,- հայտարարեց Գ․ Ծառուկյանը։