ՔԿ ղեկավար, դատախազի տեղակալ, փոխնախարար... Մեծ Բրիտանիան պատժամիջոցներ է սահմանել 25 ռուսաստանցու նկատմամբ

Մեծ Բրիտանիայի արտաքին գործերի նախարար Դոմինիկ Ռաաբը հայտարարել է Ռուսաստանի 25 քաղաքացու նկատմամբ անհատական պատժամիջոցներ սահմանելու մասին։ Ենթադրվում է, որ նրանք ներգրավված են 2009թ․ բանտում գտնվող իրավաբան Սերգեյ Մագնիտսկու մահվան գործում։
Ցուցակում կա 25 մարդ, այդ թվում՝ ՌԴ ՔԿ ղեկավար Ալեքսանդր Բաստրիկինը, գլխավոր դատախազի տեղակալ Վիկտոր Գրինը, ՌԴ ներքին գործերի փոխնախարար Ալեքսեյ Անիչինը և Մոսկվայի դատավոր Ալեքսեյ Կրիվորուչկոն:
Ցուցակի բոլոր անդամների մուտքը Մեծ Բրիտանիա արգելված է, սառեցվում են նրանց բաժնետոմսերը, ինչպես նաև արգելվում է երկրում գործարարությամբ զբաղվելը: Պատժամիջոցները ուժի մեջ են մտնում փաստաթղթի հրապարակումից անմիջապես հետո։
Նախարարը հայտարարել է նաև, որ հանցագործները պետք է պատասխանատվության ենթարկվեն: Մեծ Բրիտանիան մտադիր է թիրախավորել անհատներին կամ կազմակերպություններին, որոնք մեղադրվում են ամբողջ աշխարհում մարդու իրավունքների խախտման մեջ, ինչպես նաև նրանց, ովքեր ֆինանսական օգուտ են ստանում այդ խախտումներից: