Ամուլսարի պաշտպանները նամակ են հանձնել կառավարությանը

Ինչպես արդեն հայտնել ենք, այսօր կառավարության դիմաց Ամուլսարի հանքի շահագործման դեմ բողոքի ակցիա է իրականացվել: Ցուցարարներին է մոտեցել առավարության ներկայացուցիչը և վերցրել նրանց նամակ-պահանջը՝ ուղղված Շրջակա միջավայրի նախարար Ռոմանոս Պետրոսյանին և ՀՀ վարչապետ Նիկոլ Փաշինյանին:

Նամակում նշված է, որ կարիք չեն տեսնում կրկնել Ամուլսարի շուրջ վերջին առնվազն ութ տարում ներկայացված փորձագիտական հիմնավորումները Հայաստանի և մասնավորապես Վայոց Ձորի մարզի էկոլոգիայի, ջրային պաշարի, տնտեսության տարբեր ճյուղերի վրա բացասական ազդեցությունների վերաբերյալ:

«Մենք հիմք ենք ընդունում անցած տարի «Էլարդ» միջազգային փորձագիտական ընկերության զեկույցը, որը պատվիրել էր ՀՀ-ն: Զեկույցում հստակ մատնաշվում է, որ Լիդիան ընկերության՝ շրջակա միջավայրի վրա ազդեցության գնահատմամբ և տրամադրած փաստաթղթերի հիման վրա հնարավոր չէ եզրակցություն տալ, ուստի անհրաժեշտ է նոր ու գիտականորեն հիմնավորված ՇՄԱԳ: Կառավարությունից պահանջում ենք՝ 2016 թվականին տրված փորձաքննական դրական եզրակացությունը չեղյալ համարել: Որևէ այլ միջանկյալ գործողություն, որի հիմքով այս ծրագրի կյանքը կերկարացվի, կլինի ՀՀ օրենքների, ՀՀ վարչապետ Նիկոլ Փաշինյանի՝ միջազգային փորձաքննություն անցկացնելու խոստման կոպիտ խախտում»,- ասված էր նամակում: