Ռայնիսի փողոցի շենքերից մեկում պայթյունից տուժած տղամարդու վիճակը շարունակում է մնալ ծայրահեղ ծանր

Երևանի Ռայնիսի փողոցի շենքերից մեկում պայթյունից տուժած 2 քաղաքացիներ վերակենդանացման բաժանմունքում են, նրանց առողջական վիճակի մեջ փոփոխություն չկա: «Արմենպրես»-ի հետ զրույցում այս մասին ասաց Երևանի պետական բժշկական համալսարանի աշխատակազմի ղեկավար Շուշան Դանիելյանը:

Օգոստոսի 26-ին փլատակների տակից տարբեր մարմնական վնասվածքներով դուրս բերված 41-ամյա Էդգար Մարգարյանը և 71-ամյա Սվետլանա Սահակյանը տեղափոխվել են «Հերացի» թիվ 1 հիվանդանոցային համալիր: Բժիշկները 41-ամյա Էդգար Մարգարյանի առողջական վիճակը գնահատում են ծայրահեղ ծանր, նա միացված է արհեստական շնչառության սարքին , մյուս տուժածի՝ Սվետլանա Սահակյանի վիճակը միջին ծանրության է:

Հիշեցնենք, որ այսօր՝ ժամը 07:18-ին, Ճգնաժամային կառավարման ազգային կենտրոն ահազանգ է ստացվել, որ Երևանի Ռայնիսի փողոցի թիվ 3 հասցեում գազի արտահոսքից տեղի է ունեցել պայթյուն, ինչի հետևանքով շենքը մասնակի փլուզվել է, ամբողջությամբ փլուզվել են նույն շքամուտքի մի քանի բնակարաններ:
Փլատակների տակ մնացած երեք քաղաքացիներից մեկին՝ 56-ամյա Արթուր Ղազարյանին, փրկարարները հայտնաբերել են մահացած: 19 բնակիչ ինքնուրույն կամ փրկարարների օգնությամբ դուրս է եկել շենքի փլուզված հատվածից։ Երկու տուժած հոսպիտալացվել են։
Երևանի քաղաքապետ Հայկ Մարությանը հայտարարել էր, որ պայթյունից տուժած բնակիչները կապահովվեն ժամանակավոր կացարաններով: Ավելի ուշ Երևանի քաղաքապետարանի մամուլի խոսնակ Հակոբ Կարապետյանը հայտնել է, որ Ռայնիսի փողոցում շենքի մասնակի փլուզումից տուժած, ժամանակավոր կացարանի կարիք ունեցող բոլոր 9 ընտանիքներին քաղաքապետարանը կացարան է տրամադրել Երեւանի հյուրանոցներից մեկում։