«Հայաստանում կալանավորվել է խորհրդարանական ամենամեծ ընդդիմադիր ուժի ղեկավարը». ռուսական մամուլի արձագանքը

Երևանի ընդհանուր իրավասության դատարանը երեկ բավարարեց «Բարգավաճ Հայաստան» կուսակցության ղեկավար Գագիկ Ծառուկյանին կալանավորելու ԱԱԾ միջնորդությունը: Խորհրդարանական՝ մեծությամբ երկրորդ քաղաքական ուժի ղեկավարի կալանավորմանն են անդրադարձել Коммерсантъ-ը, РБК-ն, Интерфакс-ը, РИА Новости-ն, Lenta-ն և այլ լրատվամիջոցներ:

«Գագիկ Ծառուկյանը մեղադրվում է 2017-ի խորհրդարանական ընտրությունների ժամանակ ընտրակաշառք տալը կազմակերպելու մեջ, սակայն մեղադրանքը չի ընդունում։ Ծառուկյանը համարում է, որ ինքը քաղաքական հետապնդման է ենթարկվում Կառավարության հրաժարականը պահանջելու համար»,- գրում են Коммерсантъ-ն ու РБК-ն:

Интерфакс-ն անդրադառնում է հոկտեմբերի 8-ին նախատեսված հանրահավաքին՝ մեջբերելով ԲՀԿ-ականների ելույթները, ըստ որի «հանրահավաքը տեղի է ունենալու՝ անկախ նրանից, թե ինչ զարգացումներ կլինեն»:

РИА Новости-ն գրում է, որ «ՀՀ-ում կալանավորել են ընդդիմության առաջնորդին», որի ղեկավարած ուժը հիմնադրվել է 2004-ին ու ներկայիս խորհրդարանում ունի 24 մանդատ: «Որևէ հիմնավոր փաստ դատարանի կողմից չներկայացվեց, թե առաջադրված մեղադրանքից չորս ամիս անց Գագիկ Ծառուկյանն ինչպես է խոչընդոտել նախաքննությանը։ Տեղի ունեցածն ակնհայտ քաղաքական հաշվեհարդար է ընդդիմադիր ուժի ղեկավարի հանդեպ»,- ԲՀԿ-ի հայտարարությունն է մեջբերում լրատվամիջոցը։