«Երևի ԱՄՆ պետքարտուղարին չեն զեկուցել Արցախի մյուս քաղաքներին հասցված հարվածների մասին». Իզաբելլա Աբգարյան

Երևանի ավագանու «Իմ քայլը» խմբակցության անդամ Իզաբելլա Աբգարյանը ֆեյսբուքյան իր էջում գրել է. «Հետևելով վերջին օրերի արտաքին արձագանքներին, սրտխառնոց եմ զգում այն փաստից, որ ամեն կերպ սվաղում են կարևորագույն այն փաստը, թե ով է սանձազերծել այս պատերազմը:
Այսպես, ԱՄՆ պետքարտուղարի երեկվա տարօրինակ թվիթում, որտեղ կրկին հավասարություն էր դրվում խաղաղ բնակավայրերի թիրախավորման փաստերի միջև, նշվում էր Գյանջան (Գանձակ) և Ստեփանակերտը: Ճիշտ գրածս հերթականությամբ: Մայրաքաղաք Ստեփանակերտը, որին հասցված հարվածներով էլ Արցախը ստիպված եղավ պաշտպանվել:
Փորձում են սվաղել, որ Գյանջայի օդանավակայանին հասցված հարվածը պատասխան էր ԲԱԶՄԱԹԻՎ հայկական խաղաղ բնակավայրերին հասցրած հարվածներին: Երևի ԱՄՆ պետքարտուղարին չեն զեկուցել Արցախի մյուս քաղաքներին հասցված հարվածների մասին, որոնց հետևանքով տուժել են ոչ միայն խաղաղ բնակիչներ, այլ՝ միջազգային լրագրողներ, բուժաշխատողներ, պատմամշակութային կոթողներ:
Ստվերում թողնելով կարևորագույն փաստը, որ ռազմական ագրեսիան սանձազերծել է Ադրբեջանը, իսկ Արցախի գործողություններն եղել են բացառապես պաշտպանողական բնույթի, միջազգային հանրություն կոչվածը առաջին հերթին հարվածում է գլոբալ անվտանգությանը՝ նախադեպ ստեղծելով այլոց համար անպատիժ հարձակվելու ցանկացած երկրի վրա, իսկ հետո՝ կոստյում հագած հանգիստ նստելու բանակցային սեղանի շուրջ որպես հավասար չափով մեղավոր:
Այստեղ է, որ խարխլվում են անվտանգության ապահովման, հակաահաբեկչական պայքարի, ժողովրդավարության ու մարդու իրավունքների հիմքերը, որոնց մասին անդադար խոսում են համաշխարհային կայունության պատասխանատուները՝ նաև սեփական պետությունների հակաահաբեկչական գործողությունները բացատրելով, տարբեր երկրների հանդեպ պատժամիջոցներ կիրառելով:
Եթե այս ոճը շարունակվի, ահաբեկչության և անպատիժ հարձակվելու սրած բիզը աշխարհում դեռ շատ մարդկանց արյուն կթափի»: