«Մեզ համար այնքան էլ հասկանալի չէ Իլհամ Ալիևի հուզական արձագանքը». ՌԴ ԱԳՆ

ՌԴ ԱԳՆ-ից ռուսական ТАСС գործակալությանը հայտնել են, որ Մոսկվային անհասկանալի է Ալիևի հուզական արձագանքը Լավրովի խոսքերին:
Հիշեցնենք, որ խոսքն Արցախում օտարերկրյա վարձկանների մասին ՌԴ արտգործնախարար Սերգեյ Լավրովի հայտարարության մասին է:

«Անկեղծ ասած, մեզ համար այնքան էլ հասկանալի չէ հարգելի Իլհամ Հեյդարի Ալիևի հուզական արձագանքը Սերգեյ Վիկտորի Լավրովի մեկնաբանությանը: Միգուցե Ադրբեջանի նախագահի օգնականները նրան ցույց են տվել ուրիշի նյութեր կամ ներկայացրել են իրենց սեփական մեկնաբանությունը»,- ասել է գործակալության աղբյուրը:

«Միևնույն ժամանակ, մենք մնում ենք այն համոզմանը, որ վարձկան զինյալների ներթափանցումը Անդրկովկաս սպառնում է տարածաշրջանի բոլոր երկրների, այդ թվում՝ Ադրբեջանի և Ռուսաստանի կայունությանն ու անվտանգությանը»,- հավելել է աղբյուրը:

Ավելի վաղ իսպանական EFE գործակալությանը տված հարցազրույցում Ալիևն, անդրադառնալով վարձկանների մասին Լավրովի հայտարարությանն, ասել էր. «Անկեղծ, ցավում եմ, որ այն երկրների բարձրաստիճան պաշտոնյաները, որոնք պետք է չեզոք լինեն, գործեն ԵԱՀԿ-ի կողմից իրենց տրված մանդատի հիման վրա, օգտվում են հաստատում չգտած այդ տեղեկատվությունից և ասեկոսեներից: Ավելի քան մեկ ամսվա ընթացքում մեզ ոչ մի ապացույց, ոչ մի փաստաթուղթ, ոչ մի փաստարկ չի տրամադրվել։ Միայն հայտարարություններ։ Ուրեմն ինչու նրանք այն ժամանակ չեն տեսնում հայկական կողմում տեղի ունեցածը, քանի վարձկաններ են կռվում նրանց կողմից։ Ինչու մեզ մեղադրող Ռուսաստանը, Ֆրանսիան այդ մասին ոչինչ չեն ասել»,- ասել է նա։