«Եռակողմ պայմանավորվածության հիմքում ընկած են ԵԱՀԿ Մինսկի խմբի մշակած սկզբունքները». Լավրով

Նոյեմբերի 9-ի եռակողմ պայմանավորվածության հիմքում ընկած են կարգավորման հիմնարար սկզբունքները, որոնք մշակվել են ԵԱՀԿ Մինսկի խմբի համանախագահների կողմից և համաձայնեցված են կողմերի հետ: Այս մասին Մոսկվայում Արա Այվազյանի հետ համատեղ մամուլի ասուլիսի ժամանակ ասել է Ռուսաստանի արտգործնախարար Սերգեյ Լավրովը։
«Համանախագահները վերջին տարիներին մեծ աշխատանք են կատարել, այդ թվում մշակել, համաձայնեցրել են, ընդհանուր առմամբ, թեև ոչ մինչև վերջին դետալները, կողմերի հետ կարգավորման հիմնարար սկզբունքները։ Այդ սկզբունքներն էլ հիմք են հանդիսացել այն պայմանավորվածության համար, որն ամրագրված է Հայաստանի, Ադրբեջանի և Ռուսաստանի առաջնորդների՝ նոյեմբերի 9-ի հայտարարության մեջ։ Նկատի ունեմ Ադրբեջանին 5 և 2 շրջանների հանձնումը, տարածաշրջանում անվտանգության ապահովման համար խաղաղապահների տեղակայումը, Լեռնային Ղարաբաղի և Հայաստանի միջև Լաչինի միջանցքի ստեղծումը և տրանսպորտային ու տնտեսական կապերի, հաղորդակցության ապաշրջափակումը։ Այս ամենը ամրագրված է հայտարարության մեջ և այն իրականացվում է առավելագույնս արդյունավետ»,- ասել Է Լավրովը։