«Սա համաձայնագիր չէ, այլ ընդամենը հայտարարություն՝ հրադադարի մասին». Արա Պապյան

«Մենք կարծում ենք, որ և՛ հնարավոր է, և՛ ցանկալի է, և՛ պետք է բանակցային գործընթացը վերադարձնել Մինսկի խմբի ձևաչափին»,- այս մասին այսօր լրագրողների հետ զրույցում հայտարարեց Ազգային ժողովրդավարական բևեռի նախաձեռնող խմբի անդամ Արա Պապյանը:

Նրա խոսքով՝ տասնամյակներ շարունակ բանակցություններն ընթացել են հենց այդ ձևաչափով և պայմանավորվածությունները եղել են այդ երաշխիքներով:

«Հետևաբար, ո՛չ Ֆրանսիան, ո՛չ ԱՄՆ-ը չեն կարող իրենց օտարել և անտարբեր մնալ: Եթե խնդիրը լուծվում է ժողովուրդների ինքնորոշման սկզբունքի վրա, ապա ԼՂԻՄ-ը ամբողջովին պիտի լինի հայկական տնօրինության տակ՝ եռանախագահների երաշխիքով, եթե դա զուտ զինադադար-հրադադար է, այսինքն՝ զորքերը պիտի կանգնեին այն դիրքերի վրա, որտեղ այդ պահին էին, բնականաբար, անհասկանալի է Լաչինի, Քարվաճառի հանձնումը»:

Պապյանը համարում է, որ տեղի է ունեցել սկզբունքերի խառնում: «Դրա համար մենք այսօր հավաքվել ենք, որ ժողովրդի մի ստվար մասի կարծիքը փոխանցենք եռանախագահների երկու ներկայացուցիչներին՝ առ այն, որ իրենք մեծապես պիտի ներգրավեն և արդյունավետ աշխատանք տանեն այս առումով»:

Հարցին, թե կարո՞ղ է բանակցությունների արդյունքում ինչ-որ փոփոխությունների ենթարկել եռակողմ համաձայնագիրը, Պապյանն ասաց. «Նախ ուզում եմ ասել, որ դա համաձայնագիր չէ, այլ ընդամենը հայտարարություն է հրադադարի մասին: Հետևաբար, այդտեղ չեն կարող լինել սահմանազատումներ կամ տարածքին վերաբերող հարցեր՝ առանց խորհրդարանի մասնակցության.... Պետք է հստակեցվի՝ սա ինչ փաստաթուղթ է՝ ըստ միջազգային օրենքի, և ըստ մեր Սահմանադրության: Պիտի հստակ լինի, որ սա կարգավիճակը որոշող վերջնական փաստաթուղթ չէ»,- հավելեց Արա Պապյանը: