«Հնի վերադարձ չի լինելու այն իմաստով, որով ես եմ հասկանում»․ Վազգեն Մանուկյան

«Մենք հիմա ապրում ենք ոստիկանական պետությունում, և դա ամենաուժեղը խփում է երիտասարդությանը»,- այսօր՝ երիտասարդների հետ հանդիպման ժամանակ ասաց «Հայրենիքի փրկության շարժման» վարչապետի թեկնածու Վազգեն Մանուկյանը։

Նրա խոսքով՝ 2018-ից հետո եկավ լիբերալիզմը, որը, ըստ Մանուկյանի, վերացրեց ազգային արժեքները։ Քաղաքական գործչի կարծիքով՝ ազատությունն ու ազգայինն իրար հակասում են․ «Արդյունքում մենք ունեցանք ազգային, պետական ինստիտուտների, բանակի փլուզում, պատերազմի խայտառակ, ամոթալի պարտություն։ Այս իրավիճակից դուրս գալ այս իշխանություններով հնարավոր չէ։ Դրա համար մեր շարժումը որպես առաջին հարց դրել է Նիկոլ Փաշինյանի հրաժարականը, որից հետո մենք արդեն զրոյական կետից պիտի սկսենք բարձրանալ՝ ժամանակավոր կառավարություն մեկ տարով, հետո գնանք առաջ։ Ամենաբարենպաստ ժամանակն է, որ մենք իրականացնենք այն երազանքը, որով սկսվեց 88-ի շարժումը։ Մենք արդեն ունենք այդ դառը փորձը, հասկանում ենք՝ այս վատ երևույթները ոնց են ազդում և երբ ասում են՝ հնի վերադարձ, կարող եմ ասել՝ հնի վերադարձ չի լինելու այն իմաստով, որով ես եմ հասկանում։ Այսինքն՝ մենք հիմա մտնում ենք նոր փուլ»,- ասաց Մանուկյանը։