Թուրքիան ՌԴ հետ կքննարկի Ադրբեջանում թուրք զինվորականների գտնվելու ժամկետները

Լեռնային Ղարաբաղում իրավիճակի վերահսկողության կենտրոնի կառուցման մասին համաձայնագիրն իրականացվում է, Անկարան տարածաշրջան է ուղարկել ռազմական անձնակազմի 60 ներկայացուցիչ: Այս մասին հայտնել է Թուրքիայի ազգային պաշտպանության նախարար Հուլուսի Աքարը։
«Այժմ մեր անձնակազմից 60 մարդ գտնվում է Ադրբեջանում։ Կենտրոնի կառուցման վերաբերյալ բոլոր պայմանավորվածությունները ձեռք են բերվել 3 կողմերի միջև, մնում է լուծել մի շարք հարցեր՝ կապված շինարարության, անձնակազմի տեղակայման հետ: Մեր մարդիկ աշխատելու են ռուսների հետ միասին: Նրանց այնտեղ մնալու տևողության մասին մենք քննարկելու ենք ռուսական կողմի հետ»,- NTV հեռուստաալիքի եթերում հայտարարել է թուրք նախարարը։
Նա հավելել է, որ 30-ից 60 թուրք զինծառայող ռուս խաղաղապահների հետ համատեղ կմասնակցի տարածաշրջանում հրադադարի պահպանման մոնիթորինգին: