«Գործադիր իշխանությունում այլ պաշտոն զբաղեցնելու առաջարկ եմ ստացել». Արտակ Բեգլարյան

«Հանրապետության նախագահի կողմից գործադիր իշխանությունում այլ պաշտոն զբաղեցնելու առաջարկ եմ ստացել»,- այս մասին այսօրվա ասուլիսում հայտարարեց Արցախի Մարդու իրավունքների նախկին պաշտպան Արտակ Բեգլարյանը:

«Սրա մասին երկար եմ մտածել, դժվար որոշում է եղել՝ արդյո՞ք այս շրջանում պետք է թողնեմ ՄԻՊ-ի կարգավիճակը, թե՞ ոչ, բայց հաշվի առնելով գործադիրում աշխատելու առկա կարիքը՝ որոշում եմ կայացրել ընդունել առաջարկը»,- նշեց նա:

«Ես թեև լքում եմ ՄԻՊ-ի դիրքը, բայց մարդու իրավունքների պաշտպանության դիրքերը չեմ լքում»,- հավաստիացրեց Բեգլարյանը՝ նշելով, որ գործադիր իշխանությունում նպաստելու է մարդու իրավունքների պաշտպանությանն ուղղված տարբեր խնդիրների լուծմանը:

Արտակ Բեգլարյանը չնշեց, թե կոնկրետ ինչ աշխատանք է իրականացնելու գործադիրում:

«Իմ կարծիքով և նախագահի հետ պայմանավորվածությամբ՝ ես այնտեղ առաջին հերթին ճգնաժամային կառավարման հարցերով եմ զբաղվելու»,- ասաց նա: Բեգլարյանի խոսքով՝ առկա իրավիճակում շատ խնդիրներ պայմանավորված են կառավարման բացերով և սխալներով: