«Ադրբեջանը պառլամենտ է ներկայացրել 2021-ի ռազմական բյուջեն, որը 550 միլիոն դոլարով ավելին է, քան 2020-ի բյուջեն». Էդմոն Մարուքյան

«Այս պահին ամենամեծ մարտահրավերը Սյունիքի անվտանգությունը լուծելու խնդիրն է»,- այս մասին այսօրվա ասուլիսում հայտարարեց ԼՀԿ ղեկավար Էդմոն Մարուքյանը:

«Մեր պարտության արդյունքում այնպիսի իրավիճակ է ստեղծվել, երբ Սյունիքի համայնքները, քաղաքներն ու գյուղերը հայտնվել են ադրբեջանական տեսադաշտում»,- նշեց Մարուքյանը:

«Այդ խնդրի լույսի ներքո ուզում եմ ասել, որ Ադրբեջանը պառլամենտ է ներկայացրել 2021 թվականի ռազմական բյուջեն, որում նախատեսում է 2,7 միլիարդ դոլար ռազմական բյուջե: Այն մոտ 550 միլիոն դոլարով ավելին է, քան 2020 թվականի ռազմական բյուջեն էր»,- ասաց ԼՀԿ ղեկավարը:

«Ալիևը պատերազմից հետո բազմիցս նշել է, որ Արցախի հիմնախնդրի կարգավորման հարց այլևս չկա, և այդ հայտարարությունն անելուց հետո Ադրբեջանը շարունակում է պահպանել ռազմական ծախսերը, դեռ մի բան էլ ավելացնել…»,- նկատեց Մարուքյանը:

Ըստ ԼՀԿ ղեկավարի՝ սա նշանակում է, որ թշնամին նոր արկածախնդրությունների է պատրաստվում, և դրանցից պաշտպանվելու համար պետք է ունենալ նոր ռազմավարություն: