ԱՄՆ-ի հեռացող վարչակազմը մտադիր չէ ՌԴ-ի հետ երկարաձգել ՌՀՍՊ պայմանագիրը ներկայիս տեսքով

ԱՄՆ-ի գործող նախագահ Դոնալդ Թրամփի վարչակազմը չի պատրաստվում ներկայիս տեսքով երկարաձգել Ռազմավարական հարձակողական սպառազինությունների հետագա կրճատման և սահմանափակման միջոցառումների մասին պայմանագիրը: Այս մասին հայտարարել է ԱՄՆ նախագահի սպառազինությունների վերահսկման հարցերով հատուկ ներկայացուցիչ Մարշալ Բիլինգսլին, փոխանցում է ТАСС-ը:

«Մենք շահագրգռված չենք պարզապես երկարաձգել Ռազմավարական հարձակողական սպառազինությունների հետագա կրճատման և սահմանափակման միջոցառումների մասին պայմանագիրը։ Այդ պայմանագիրը, ինչպես ասել եմ, դժվարությամբ ընդունվեց Սենատում (2010-ին վավերացման ժամանկ)»,- նման կարծիք է արտահայտել Բիլինգսլին: «Պատճառն այն է, որ դա վատ գործարք է ԱՄՆ-ի համար: Համաձայնագիրը ծածկում է ամերիկյան (միջուկային) զինանոցի 90%-ը և միևնույն ժամանակ ռուսական զինանոցի 40%-ը»։

ԱՄՆ-ում Ռուսաստանի դեսպանատունը կոչ է արել ամերիկյան իշխանություններին օգտագործել մնացած ժամանակահատվածը և երկարաձգել պայմանագիրն՝ ի շահ 2 երկրների և ամբողջ աշխարհի: 10-ամյա համաձայնագրի գործողության ժամկետը լրանում է 2021-ի փետրվարի 5-ին: