«ԼՂ-ի կարգավիճակը լրացուցիչ բանակցություններ է պահանջում»․ Մատվիենկո

Լեռնային Ղարաբաղի կարգավիճակը որոշելու համար լրացուցիչ բանակցություններ են անհրաժեշտ, Ռուսաստանն այդ հարցում ակնկալում է Ֆրանսիայի և Միացյալ նախագահների ջանքերը, այս մասին հայտարարել է Ռուսաստանի Դաշնային խորհրդի խոսնակ Վալենտինա Մատվիենկոն, փոխանցում է ТАСС-ը։
«Մենք, անշուշտ, ակնկալում ենք, որ ԵԱՀԿ-ն, Ֆրանսիայի նախագահն, ԱՄՆ-ը և այլ պետություններ, որոնք ներգրավված են Լեռնային Ղարաբաղի հակամարտության կարգավորման գործընթացում, ջանքեր կգործադրեն։ Շատ բարդ աշխատանք է սպասվում»,-ասել է Մատվիենկոն։
Նրա խոսքով, այդ հակամարտությունը «բռնկվել է, տևել ավելի քան 30 տարի, սակայն լուծում չի ստացել»:
«Մենք դադարեցրել ենք այն, թույլ չենք տվել հակամարտության հետագա սրացում, նոր մարդկային զոհեր։ Դա շատ բարդ համաձայնագիր էր, դրան հասնելը հեշտ չի եղել։ Այսօր հակամարտության գոտում հենց ռուս խաղաղապահներն են պահպանում այդ համաձայնագիրը, թույլ չեն տալիս խախտել դրա դրույթները, վերադառնալ զինված բախումների, նպաստում են խաղաղ կյանքի հաստատմանը, փախստականների վերադարձին», -հավելել է Դաշնային խորհրդի խոսնակը։