Զելենսկին հայտնել է՝ երբ կզանգահարի Պուտինին

Ուկրաինայի նախագահ Վլադիմիր Զելենսկին Фокус պարբերականի հետ զրույցում նշել է այն պայմանը, որի դեպքում նա կզանգահարի Ռուսաստանի նախագահ Վլադիմիր Պուտինին: «Ես կարող եմ նրան զանգահարել, նա հաստատ ինձ հետ կշփվի»,- ասել է Զելենսկին:
Պատասխանելով լրագրողի հարցին, թե ինչու դեռ չի արել, ասել է՝ խոսակցության թեմա չկա։
Ուկրաինայի ղեկավարի խոսքով՝ եթե «նորմանդական ձևաչափի» (Ռուսաստան, Ուկրաինա, Ֆրանսիա, Գերմանիա) առաջնորդների խորհրդականների հանդիպման մասին որոշումը ձգձգվի, ապա նա անպայման կշփվի Ռուսաստանի նախագահի հետ: Զելենսկին նշել է, որ եթե դա օգնի ավելի արագ դադարեցնել պատերազմը, ապա Ուկրաինայի ղեկավարը «պետք է շփվի նրա հետ»:
Նա նաև ընդգծել է, որ երկխոսությունը պետք է լինի ինչպես նորմանդական ձևաչափի շրջանակներում, այնպես էլ ուղիղ:
«Քանի որ կան հարցեր, որոնք մենք չենք բարձրացնում «նորմանդական ձևաչափում»։ Այդ պատճառով մենք պետք է խոսենք դեմ առ դեմ»,- պարզաբանել է Զելենսկին։
Ավելի վաղ Ռուսաստանի նախագահի մամուլի քարտուղար Դմիտրի Պեսկովը, մեկնաբանելով Ուկրաինայի նախագահ Վլադիմիր Զելենսկու հետ Վլադիմիր Պուտինի բանակցությունների հնարավորությունը, պարզաբանել էր, որ հանդիպում պարզապես հանդիպելու համար ոչ ոքի պետք չէ: