Լավրովն ու Չավուշօղլուն կքննարկեն Ղարաբաղում ռուս-թուրքական համատեղ կենտրոնի գործունեությունը

Ռուսաստանի և Թուրքիայի արտգործնախարարներ Սերգեյ Լավրովն ու Մևլութ Չավուշօղլուն դեկտեմբերի 29-ին Սոչիում կայանալիք հանդիպման ընթացքում կքննարկեն Լեռնային Ղարաբաղում հրադադարի ռեժիմի վերահսկողության ռուս-թուրքական համատեղ կենտրոնի գործունեության հարցը:
ՌԴ ԱԳՆ-ում հայտարարել են, որ կողմերը ծրագրում են մանրամասնորեն մշակել Ռուսաստանի, Հայաստանի և Ադրբեջանի ղեկավարների՝ Լեռնային Ղարաբաղի վերաբերյալ եռակողմ հայտարարության իրականացման հետ կապված ընթացիկ հարցերը:
Նախարարները շեշտը կդնեն հնարավոր բախումների ռիսկերը նվազեցնելու և կողմերին հումանիտար օգնություն ցուցաբերելու վրա:
Ռուսական գերատեսչությունում նշել են, որ ռուս-թուրքական համատեղ կենտրոնը Մոսկվայում դիտարկում են որպես հետկոնֆլիկտային կարգավորման օժանդակ տարր՝ ի լրումն ռուս խաղաղապահների առաքելության և այլ միջոցառումների:
«Դրա խնդիրների մեջ, ինչպես հայտնի է, մտնում է իրավիճակի մոնիթորինգը, մասնավորապես, անօդաչու թռչող սարքերի միջոցով խախտումների մասին տվյալների հավաքումը, ամփոփումը և ստուգումը»,- ասված է հաղորդագրության մեջ։
ՌԴ ԱԳՆ-ում հավելել են, որ Ռուսաստանը լուրջ մտահոգություն է հայտնում հոկտեմբեր-նոյեմբեր ամիսներին Լեռնային Ղարաբաղի հակամարտության գոտում օտարերկրյա վարձկանների տեղափոխման կապակցությամբ։