Կիևը վստահ է, որ ընդհանուր լեզու կգտնի Բայդենի վարչակազմի հետ

Ուկրաինայի արտաքին գործերի նախարար Դմիտրի Կուլեբան կարծում է, որ Կիևն ընդհանուր լեզու կգտնի ԱՄՆ-ի նոր վարչակազմի հետ, իսկ Ուկրաինայի առաջնորդ Վլադիմիր Զելենսկու և ԱՄՆ նորընտիր նախագահ Ջո Բայդենի միջև «հրաշալի կապ կհաստատվի»:

«Ես համոզված եմ, որ մենք ընդհանուր լեզու կգտնենք նոր վարչակազմի հետ, որը շատ լավ է հասկանում Ուկրաինային։ Ես համոզված եմ, որ երբ նախագահ Զելենսկին և նախագահ Բայդենը հանդիպեն և խոսեն, նրանց միջև հրաշալի շփում կստացվի»,- ասել է Կուլեբան։

Նրա խոսքով՝ ԱԳՆ-ն աշխատում է այս տարի նման հանդիպում անցկացնելու ուղղությամբ։ «Մենք աշխատում ենք այդ ուղղությամբ, որպեսզի նրանք, որքան հնարավոր է արագ զրուցեն և հանդիպեն: Հենց նման խոսակցությունների ժամանակ կարելի է հասնել ռազմավարական պայմանավորվածությունների և փոխըմբռնման»,- հավելել է Ուկրաինայի ԱԳՆ ղեկավարը։