Հինգշաբթի, 28 մարտի, 2024 թ.
|
Ստեփանակերտում`   +14 °C

10 ժամ ձնաբքի տակ մնացած և կլինիկական մահ տարած երեխայի կյանքը փրկվել է Ապարան ԲԿ-ի բժիշկների շնորհիվ

10 ժամ ձնաբքի տակ մնացած և կլինիկական մահ տարած երեխայի կյանքը փրկվել է Ապարան ԲԿ-ի բժիշկների շնորհիվ
444
Հինգշաբթի, 21 հունվարի, 2021 թ., 22:35

10 ժամ ձնաբքի տակ մնացած և կլինիկական մահ տարած 17-ամյա տղայի կյանքը փրկվել է Ապարանի ԲԿ-ի բուժաշխատողներ՝ Մարգարիտա Աճեմյանի, Հայկ Շմավոնյանի, Լիլիթ Համբարյանի և ԲԿ-ի մի շարք այլ բուժաշխատողների ջանքերով. այս մասին MAMUL.am-ը տեղեկացավ Ապարանի բժշկական կենտրոնից:

Դեպքի առնչությամբ, «Հայկական ժամանակ»-ը գրում է.

«Հունվարի 19-ին՝ ժամը 16:20-ին, Արագածոտնի մարզային ճգնաժամային կառավարման կենտրոն ահազանգ էր ստացվել, որ քաղաքացիները բարձրացել են Ձորագլուխ գյուղի մոտակա սարը և վատ եղանակային պայմանների ու ձյան բարձր շերտի պատճառով չեն կարողանում իջնել:

Ըստ ԱԻ նախարարության՝ անհրաժեշտ է եղել փրկարարների օգնությունը: Փրկարակներին հաջողվել է գտնել երկու քաղաքացիներին, որոնցից մեկը 17-ամյա տղան է։

Տղայի հայրը՝ Արման Բ.-ն, մեզ հետ զրույցում նշեց՝ ընտանիքը Ձորագլուխ գյուղից է, նախորդ 7 տարիներն ապրել են Արցախի Քաշաթաղի շրջանի Կովսական համայնքում։ Սակայն 2020 թվականի Արցախյան երկրորդ պատերազմի հետևանքով ընտանիքը կորցրել է տունը և նորից տեղափոխվել Ձորագլուխ, որտեղ ապրում են բարեկամի տանը։

«Կովսականի մեր տունը անցավ ադրբեջանական կողմին, մենք էլ նորից վերադարձանք մեր հայրենի գյուղը՝ ամեն ինչ նորից սկսելու։ Այդ օրն էլ տղաս մեր բարեկամի հետ էր բարձրացել սար, որպեսզի նրա 19-ը ձիերին իջացնեին սարից։ Ինձ տեղյակ պահել էր, ես գիտեի, որ ինքն իր ձիով բարեկամի հետ է։ Հետո զանգահարեց ինձ, բացատրեց տեղը, ասաց՝ ձնաբուք է սկսվել, սառում է։ Ձիով է եղել, հետո ոտքով է սկսել քայլել, բայց ձնաբքի պատճառով չի կարողացել կողմնորոշվել և մոլորվել է»,- ասաց հայրը։

Հայրը պատմում է՝ երեխայի որոնողական աշխատանքները սկզբում սկսել են գյուղի երիտասարդների հետ։ Իսկ տղային գտնելուց հետո փրկարարների հետ միասին տեղափոխել են շտապօգնության մեքենա, որտեղից էլ՝ Ապարանի բժշկական կենտրոն։ Բժիշկները նրա վիճակը գնահատել են ծանր։

Ապարան ԲԿ-ի բժիշկ, ռեանիմատոլոգ Լիլիթ Համբարյանը, որը տղային բուժող բժիշկն է, նշել է, որ տղայի մոտ հիվանդանոց տեղափոխվելուն պես գրանցվել է «կլինկական մահ» վիճակ՝ սրտի և շնչառության կանգով։ Բժիշկները նրա կյանքի համար պայքարել են շուրջ 1 ժամ 15 րոպե։

«Երբ տղային տեղափոխեցին, երեխայի ուղեղը դեռ պահպանվում էր։ Ժամ 15 րոպե բոլորս՝ ռեանիմատոլոգները, բժիշկները, բոլոր անձնակազմով սկսեցինք սիրտ-թոքային ռեանիմացիա անել։ Սա հազվագյուտ դեպքերում է արվում, որովհետև ռեանիմացիան տևում է 30-40 րոպե, եթե դրանից հետո չի վերկանգնվում վիճակը, ռեանիմացին ընդհատում ենք։ Բայց ռեանիմացիան շարունակվեց, քանի որ բիբերի նեղություն ուներ չափավոր լայնությամբ, և ուղեղը դեռ պահպանված էր»,- մանրամասնեց Սարգսյանը։

Ռեանիմացիայից հետո վերականգնվել է տղայի սրտի աշխատանքը, հետո՝ միացվել ապարատային շնչառություն։ 12 ժամ հետո տղան գիտակցության է եկել։ Հանվել է արհեստական շնշառության սարքը։

«Հիմա նա ակտիվ կոնտակտի մեջ է մտնում։ Հասկանում է՝ ինչ է կատարվում, պատմում է իր հետ կատարվածը։ Բոլոր ռեֆլեքսները պահպանված են, միայն ոտքերին և ձեռքերին կան ցրտահարության երկրորդ աստիճանի օջախներ։ Ընդհանուր կան մանր ցրտահարության օջախներ, որոնք արդեն մշակվել են։ Այսինքն՝ իր հեմոդինամիկան կարգին է»,- հավելեց բժիշկը։