«ԱՄՆ-ը փոխգործակցում է ՌԴ-ի հետ՝ Ղարաբաղի, Ուկրաինայի, Լիբիայի հարցերով». Ջոն Սալիվան

ԱՄՆ-ը Ռուսաստանի հետ համագործակցում է Լեռնային Ղարաբաղի, Ուկրաինայի, Լիբիայի հարցերով, ինչպես նաև Կորեական թերակղզու ապամիջուկայնացման շուրջ, և ցանկանում է շարունակել երկխոսությունը, այս մասին հայտարարել է Մոսկվայում ԱՄՆ դեսպան Ջոն Սալիվանը, փոխանցում է РИА «Новости»-ն: «ԱՄՆ-ը, Ֆրանսիան և Ռուսաստանը հանդիսանում են Մինսկի խմբի համանախագահ երկրներ: Ճեպազրույցի ժամանակ մեզ տեղեկացրել են ԼՂ-ում տեղի ունեցած իրադարձությունների մասին: Դա ևս մեկ օրինակ է այն ոլորտի, որտեղ ԱՄՆ-ը փոխգործակցում է Ռուսաստանի և Ֆրանսիայի կառավարությունների հետ՝ որպես ՄԽ համանախագահ, և մենք ցանկանում ենք շարունակել այդ հարցերի շուրջ փոխգործակցությունը»,- ասել է դեսպանը՝ «Дождь»-ի եթերում: Նա հավելել է, որ ԱՄՆ-ն ու ՌԴ-ն ունեն փոխգործակցություն նաև Լիբիայի հարցով: Պաշտոնյան խոստովանել է, որ կան աշխարհաքաղաքական շատ հարցեր, որոնց շուրջ երկու երկրներն ունեն տարաձայնություններ, օրինակ՝ Ուկրաինայի հարցի: «Բայց երկխոսությունը շարունակելն անհրաժեշտություն է»,- ասել է Սալիվանը: