«Կարևոր չէ՝ ով է սկսել պատերազմը, ում պատմական հողն է Արցախը. պետք է առաջ նայենք». Անուշ Բեղլոյան

«Իմ քայլի» պատգամավոր Անուշ Բեղլոյանը «Пограничная ZONA» նախագծի առցանց կոնֆերանսի ժամանակ հայտարարել է, թե «կարևոր չէ՝ ով է սկսել պատերազմը, ում պատմական հողն է» և խոսել է ռուս խաղաղապահներին Արցախից դուրս բերելու հեռանկարի մասին։

Նշենք, որ կոնֆերանսին մասնակցել են նաև Թուրքիայի, Ադրբեջանի և Վրաստանի ներկայացուցիչները։

«Մենք պետք է առաջ նայենք, չվերադառնանք անվերջանալի քննարկումներին՝ ով է եղել առաջինը, ում պատմական հողն է, որովհետև, ինչպես գիտեք, հայերը հավասարը չունեն պատմական սկզբնաղբյուրներին և գրողներին հղում անելու հարցում։ Երկու կողմն էլ զբաղվել է դրանով 30 տարի, և դա մեզ բերել է պատերազմի»,- նշել է նա:

Ռուս խաղաղապահների առնչությամբ Բեղլոյանն ասել է. «Կարևոր է ընդունել փաստը, որ նրանք արդեն այստեղ են։ Ինչն էլ որ նրանց բերել է այստեղ՝ մենք չենք կարող փոխել իրողությունը։ Եվ քանի որ նրանք արդեն այստեղ են ու մնալու են առաջիկա 5 տարին, պետք է օգտագործենք այդ ժամանակը, որպեսզի Լեռնային Ղարաբաղում ապահովենք անվտանգ կյանքի պայմաններ հայերի և ադրբեջանցիների համար, եթե վերջինները ցանկանան վերադառնալ։ Կախված այդ ջանքերից՝ մենք կա՛մ կտեսնենք օտարերկրյա զինվորականներին մեր մոտ ևս 5 տարի, կա՛մ կունենանք խաղաղություն տարածաշրջանում․․․»,- ասել է Բեղլոյանը։