«Ռուսաստանի և ԵՄ հարաբերությունների գլխավոր խնդիրը նորմալության բացակայությունն է»․ Լավրով

ՌԴ ԱԳ նախարար Սերգեյ Լավրովը Ռուսաստանի և Եվրոմիության հարաբերություններում գլխավոր խնդիրը համարել է «նորմալության բացակայությունը», հաղորդում է ТАСС-ը։

«Իհարկե, գլխավոր խնդիրը, որի հետ մենք բոլորս բախվում ենք, Ռուսաստանի և Եվրոմիության՝ եվրասիական տարածքում 2 խոշորագույն խաղացողների միջև հարաբերությունների նորմալության բացակայությունն է։ Դա, իհարկե, անառողջ իրավիճակ է, որը ոչ մեկին ձեռնտու չէ»,- ասել է Լավրովը՝ բանակցություններ սկսելով Եվրոմիության արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելի հետ:
ՌԴ ԱԳ նախարարի խոսքով՝ արդեն հասունացել է ԵՄ-ի և Ռուսաստանի հարաբերություններում իրավիճակի վերանայման անհրաժեշտության հարցը․ «Ակնկալում եմ, որ բացի այլ հարցերից, որոնց վրա դուք պատրաստվում եք կենտրոնանալ, մենք կարող ենք անդրադառնալ նաև այս հիմնարար թեմային»,- ասել է նա։
Լավրովը պատրաստակամություն է հայտնել պատասխանել ցանկացած հարցի, որը կբարձրացվի այս բանակցությունների ընթացքում:

«Կփորձենք ձեզ հուսախաբ չանել: Մենք պատրաստ ենք քննարկել ձեզ հետաքրքրող ցանկացած թեմա՝ ներառյալ տարածաշրջանային հակամարտությունները և ցանկացած այլ հարց»,- ասել է Լավրովը։