«Ներսից գիտեմ, որ գնալով ավելի դժվար է դառնում գտնել դատախազներ»․ Հայկ Ալումյան

«Այս քաղաքական իշխանությունը դեռ սկզբից ցույց է տվել, որ իրենք առանց որևէ կոմպրոմիսների՝ պայքարելու են էն դատավորների դեմ, ովքեր կհամարձակվեն պարոն Քոչարյանի իրավունքը վեր դասել իշխանության կամքից»,- այսօր՝ մամուլի ասուլիսի ժամանակ հայտարարեց ՀՀ 2-րդ նախագահ, «Մարտի 1»-ի գործով գլխավոր ամբաստանյալ Ռոբերտ Քոչարյանի պաշտպաններից Հայկ Ալումյանը։

Ըստ նրա՝ իր խոսքերի ապացույցն այն է, որ երբ առաջին անգամ դատարանը Քոչարյանի կալանքը՝ որպես խափանման միջոց վերացրեց, Փաշինյանը հանրահավաք անցկացրեց և, ըստ Ալումյանի, «շատ գռեհիկ ձևով վիրավորեց գործը քննող դատավորին»։

«Երբ գործը հասավ Աննա Դանիբեկյանին, արդեն բոլորի համար պարզ էր, որ իշխանությունները չեն հանդուրժելու, որ հանկարծ որևէ դատավոր որոշում կայացնի, որը հաճո չէ, օրինակ, պարոն Փաշինյանին»,- ասաց նա։

Անդրադառնալով դատախազության գործունեությանը՝ Ալումյանն ասաց․ «Ես համոզված եմ, որ մի օր իրենք հաստատապես հասկանալու ու գիտակցելու են, թե ինչ արվեց իրենց ձեռքով։ Ես գիտեմ, որ դատախազությունում գնալով ավելի ու ավելի քիչ մարդ է մնում, ովքեր պատրաստ են այդ նպատակին ծառայել։ Ես գիտեմ, որ գնալով ավելի ու ավելի դժվար է դառնում գտնել դատախազներ, ովքեր կգային դատարան ու այդ դերը կստանձնեին, ես դա դատախազության ներսից գիտեմ»։