«Ոչ թե Ռուսաստանը, այլ Եվրոխորհրդարանի պատգամավորներն են նվաստացնում Բորելին»․ Զախարովա

Մոսկվա կատարած այցից հետո, Եվրոխորհրդարանի պատգամավորներն իրենք են նվաստացնում ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելին: Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Նրանք (Եվրոխորհրդարանի պատգամավորներն) իրենք են նվաստացնում Բորելին՝ նրա այցը Մոսկվա անհասկանալի մի բան որակելով»,-ասել է դիվանագետը՝ մեկնաբանելով Արևմուտքի արձագանքը նախորդ շաբաթ կայացած աշխատանքային այցին:
Զախարովան ընդգծել է, որ «Արևմուտքը Նավալնիի գործով փաստեր չի ներկայացնում»։
«Եվ հիմա ամեն ինչում Բորելն է մեղավոր։ Մինչ այդ, բոլոր խնդիրների մեղավորը Թրամփն էր»,-հավելել է նա։
Եվրոխորհրդարանում հատուկ լսումներ են անցկացվել Բորելի՝ փետրվարի 4-6-ը Մոսկվա կատարած այցի վերաբերյալ: Պատգամավորների մեծ մասը Բորելին չափազանց կոշտ քննադատության է ենթարկել. Նրան մեղադրել են Ռուսաստան կատարած այցի, այցի ժամանակահատվածի անհաջող ընտրության, Ռուսաստանի նկատմամբ ոչ բավականաչափ կոշտ դիրքորոշման համար։