«ԵԱՀԿ Մինսկի խմբի համանախագահների գործունեությունը պետք է շարունակվի»․ Ռուդենկո

ТАСС-ին տված հարցազրույցում ՌԴ փոխարտգործնախարար Անդրեյ Ռուդենկոն ասել է․ «ԵԱՀԿ Մինսկի խմբի համանախագահների գործունեությունը պետք է շարունակվի։ Նրանք կարևոր ներդրում են ունեցել Լեռնային Ղարաբաղում հակամարտության կարգավորման հիմնարար սկզբունքների մշակման գործում, որոնցից շատերն արտացոլվել են 2020 թվականի նոյեմբերի 9-ի հայտարարության մեջ:

Սա վերաբերում է նաև Լեռնային Ղարաբաղի շուրջ գտնվող շրջանները՝ Ադրբեջանին վերադարձնելուն, փախստականների վերադարձին, Լեռնային Ղարաբաղը Հայաստանի հետ կապող միջանցքի պահպանմանը, անվտանգության ապահովմանը, խաղաղապահ գործողությանը, տարածաշրջանում տնտեսական և տրանսպորտային բոլոր կապերի ապաշրջափակմանը»։

ՌԴ փոխարտգործնախարարը նշել է, որ նախկինի պես պահանջված է մնում համապարփակ քաղաքական կարգավորման հասնելու խնդիրը, որը ԵԱՀԿ Բուդապեշտի գագաթնաժողովի (1994թ.) որոշումների համապատասխան վստահված է Մինսկի խմբի համանախագահներին։

«Եռյակն ունի միջազգային ուժեղ աջակցություն և կարող է օգտակար լինել հետագա քայլերի փոխադարձ ընդունելի մոտեցումների մշակման համար՝ ներառյալ կարգավիճակի հետ կապված խնդիրները: Բայց ուշադիր, առնաց շտապելու, երբ ժամանակը գա։

Այժմ ԵԱՀԿ Մինսկի խումբը, նրա համանախագահները կարող են ակտիվություն ցուցաբերել հայերի և ադրբեջանցիների միջև վստահության միջոցների ամրապնդման գործում։ Քաղաքացիական հասարակության շրջանում երկխոսության զարգացումը կնպաստի տարածաշրջանում իրավիճակի ընդհանուր բարելավմանը»,-նշել է Ռուդենկոն:

Խոսելով Լեռնային Ղարաբաղում հրադադարի վերահսկողության ռուս-թուրքական համատեղ կենտրոնի գործունեության մասին՝ ՌԴ փոխարտգործնախարարը նշել է՝ «նման կենտրոնի բացումը դիտարկում ենք, որպես տարածաշրջանում իրավիճակի նորմալացմանն ուղղված համատեղ ջանքերի լավ օրինակ»։