#РИАНовости-ի անդրադարձը Սերժ Սարգսյանի հարցազրույցին

Ռուսական РИА Новости լրատվական գործակալությունն անդրադարձել է Սերժ Սարգսյանի՝ Armnews հեռուստաալիքին տված հարցազրույցին և մեջբերումներ կատարել։

Հոդվածում նշվում է ՀՀ նախկին նախագահ Սերժ Սարգսյանի այն կարծիքը, որ 2020-ին Լեռնային Ղարաբաղում հակամարտության սրման ժամանակ անհաջողությունների են հանգեցրել անպատրաստ ռազմական գործողությունները:

«Իրեն գերագույն գլխավոր հրամանատար հռչակած Նիկոլ Փաշինյանն անձամբ է լսել և հավանություն տվել կապիտուլյացիայի պատճառ դարձած գործողությանը», մեջբերվել է Լալե Թեփե բարձունքի շրջանում ռազմական գործողության մասին՝ Սարգսյանի խոսքը։

«Ամեն անգամ պարտադրվում էր բեկում մտցնել ռազմական գործողություններում։ Բեկում մտցնելն անպատրաստ հակահարձակումները չեն։ Դրա համար պետք է կարողանաս ռեզերվային ուժերի օգնությամբ գրավել հարմարավետ բնագծեր, դիմավորել քո նահանջող զորքին, որպեսզի նրանք կարողանան արդեն թիկունքում լրացնել իրենց սանիտարական կորուստները, զենքի, զինամթերքի պակասը և այլն, իսկ թարմ ուժերով կարողանաս կանգնեցնել հակառակորդին, որից հետո արդեն կարելի է մտածել հակահարձակողական օպերացիա կազմակերպելու մասին»,-գործակալությունը մեջբերել է Սարգսյանի խոսքերը։

Նրա խոսքով՝ «դրա փոխարեն փորձ է արվել շրջափակման մեջ վերցնել ադրբեջանական այն ստորաբաժանումները, որոնք արդեն խորացել էին և այդ ընթացքում օգտագործել մեր լավագույն բրիգադաները՝ մեր ռեզերվը»։